O PPdeG celebra o “fito histórico” que supón que Galicia poida exercer xa as competencias de xestión do seu litoral logo de anos de reivindicacións lideradas polo presidente Alfonso Rueda e que agora se traducirán nunha maior seguridade xurídica para as empresas, os particulares e os concellos ubicados ao longo dos máis de 1.500 quilómetros de costa da nosa Comunidade.

“Galicia traballouno, Galicia merecíao, e demostrará a partir de agora por que pedía esas competencias”, afirmou ao respecto a secretaria xeral dos populares galegos, Paula Prado, logo de manter unha reunión en Cangas con representantes do sector mar-industria na comarca na que estivo acompañada polo presidente provincial do PP de Pontevedra, Luis López, e a líder local do partido, Loli Hermelo.

Prado incidiu en que “para os galegos o mar é emprego, é riqueza e é vida” e de aí que ao longo destes anos se traballara para que o litoral galego foxe xestionado desde Galicia: “Non tiña sentido que iso se estivera facendo desde un despacho de Madrid, cando somos a Comunidade con máis quilómetros de costa de España”.

De feito, remarcou que o espazo litoral sobre o que agora o Goberno galego terá plenas competencias abrangue unha superficie de 16.000 quilómetros cadrados –o equivalente a “máis do triplo da superficie que ten a provincia de Pontevedra”– e no que se atopan 86 concellos, incluído o de Cangas, que “teñen moito que dicir e cos que a Xunta vai valar e deixar claro que isto non vai de cores”.

“É o momento de recuperar o tempo perdido co noso litoral e por iso, fronte aqueles que só protexen o medio ambiente nas súas pancartas, o PPdeG ofrecerá realidades e seguridade xurídica para protexer a nosa costa”, concluíu afeando a actitude mostrada ao longo deste tempo por un Goberno estatal do que “o único que Galicia recibiu foron negativas, desprezos e adiamentos”.

Xa en clave nacional, Paula Prado asegurou que “Galicia e toda España necesitan xa deixar de sufrir a parálise dun Goberno central ocupado exclusivamente en tapar a súa corrupción”. E, por iso, avanzou que esta fin de semana medio millar de galegos e galegas, liderados polo presidente Alfonso Rueda, “tomarán partido por España” no Congreso Nacional do PP. Un evento no que Galicia, asegurou logo do nomeamento de Miguel Tellado como novo secretario xeral nacional e co presidente Alberto Núñez Feijóo, “será protagonista”.

GALICIA GOBERNA O SEU LITORAL

Todas estas cuestións foron abordadas na reunión que os representantes do PPdeG tiveron con membros da cadea mar-industria para valorar a repercusión destas novas competencias asumidas por Galicia. Entre eles, a presidenta e o secretario de Frigoríficos do Morrazo, Sonia Barreiro e José Carlos Barreiro, o co-fundador de Wofco, Alberto Barreiro, o patrón maior da Confraría de Cangas, Javier Costa, e os xerentes de Pescados Marcelino, Gustavo Adolfo Marcelino e Ramón Marcelino.

Logo da reunión e da visita á piscifactoría de Frigoríficos do Morrazo, puideron dar un paseo polo litoral deste concello e a cuxo remate o presidente provincial do PP de Pontevedra, Luis López, abordou a relevancia que o litoral ten para esta provincia.

“Tres de cada cinco empresas que máis facturan na nosa provincia pertencen ao sector mar-industria, por non falar das vivendas e equipamentos públicos que se sitúan no litoral e nos converten nunha provincia que mira ao mar e que, en consecuencia, coida ao mar”, explicou.

Por iso o líder provincial comprometeu o traballo e apoio de Pontevedra ao Goberno galego na xestión de “algo crucial” como é o litoral. De feito, quixo felicitar ao presidente Rueda e a todo o seu equipo: “Grazas ao seu inxente traballo e tras anos de loita, conseguimos que as decisións sobre o noso as tomemos nós”.

Loli Hermelo, pola súa banda, incidiu na importancia da Lei do Litoral aprobada hai dous anos e que agora fará posible, unha vez asumidas estas competencias, que Galicia “poida xestionar o seu litoral, protexer o seu medio ambiente, decidir sobre o seu futuro e crecer dun xeito sustentable”.

“Cangas é un concello que vive cara o mar e que ama o seu mar porque representa todo o que somos”, asegurou a líder do partido neste concello ao tempo que facía referencia ao pasado vinculado á antiga fábrica de Massó e ao futuro que teñen por diante as numerosas empresas asentadas no litoral cangués.