O presidente Alfonso Rueda subliñou hoxe o seu desexo de que “se vexa cada vez máis a diferenza entre os que cren que gobernar e xestionar o día a día é o fundamental”, como o PPdeG, e aqueles partidos que “ideoloxizan, polarizan e están todo o día á gresca”.
“Estamos vendo un presidente de España á defensiva, que fala no Senado como se estivera nun xulgado porque sabe perfectamente que lle están facendo preguntas de cousas que non pode recoñecer. E se estás aí, coa cabeza en mil leas xudiciais provocadas ou permitidas por ti mesmo, é que non tes tempo para gobernar. Eu quero que cada vez máis nos diferenciemos de todo iso”, manifestou Rueda este mediodía ante uns 350 asistentes do Congreso Local do PP de Ponteareas no que Nava Castro foi elixida como novo presidenta do partido.
O presidente dos populares galegos lamentou que a nivel nacional se estea vendo como algúns “levantan muros e parecen empeñados en que traguemos con que pensar que o importante é estar cada un nun lado e que non haxa ninguén que se estea ocupando das cousas do día a día”. “Eu sinceramente creo iso é antipolítica. A xente que nos dá a súa confianza ou os que dan a cara como militantes é para que fagamos as cousas ben, para que non perdamos o tempo e para que teñamos principios”, sinalou.
Nese sentido, asegurou que a do PPdeG é “unha familia forte” que vai seguir sendo un exemplo e “non se vai amedrentar” fronte aos que “fan manifestacións e din que hai que tensionar a rúa e crear conflito, pero non gobernar”. “Os que din sempre que ‘non’, os da algarada, os que pensan que meternos medo é unha ferramenta que nos vai botar para atrás, teñen que saber que iso non é posible. En Ponteareas sabedes moi ben do que falo: durante anos tivestes que sufrir o sectarismo, o pensar que o importante era a ideoloxía e o de menos era xestionar”, engadiu.
CHAMAMENTO Á “UNIDADE” PARA OBTER A MAIORÍA ABSOLUTA
“En Ponteareas vese mellor que en ningún outro sitio e Nava Castro é unha referente, espero que con maioría absoluta cando dentro de un ano e medio haxa que volver a pedir a confianza”, augurou Rueda, que fixo un chamamento á “unidade”: “A unión fai a forza e non hai maior forza que ter maioría absoluta, e por iso temos que loitala. Collendo todas as esencias, probablemente perdendo algo todo o mundo para poder gañar todos. O camiño ten que ir por aí”, agregou.
Deste xeito, avogou por “non perder o tempo” para poder “gobernar e xestionar”, para desenvolver actuacións como o saneamento ou a depuradora de Ponteareas, así como o proxecto dese centro de saúde que “tanta falta fai”, e para seguir axudando “para que as magníficas instalacións municipais sexan aínda mellores”.
Rueda situou Ponteareas como “un dos concellos máis importantes desta provincia” e dixo alegrarse de “ser o presidente dun goberno que fixo os deberes con Ponteareas, un goberno serio”.
Por último, lembrou que durante todos os anos que traballou con Nava Castro sempre percibiu “unha persoa firme, leal, traballadora, teimuda, con obxectivos claros, que sabe o que quere e que loita por iso”. “Como directora de Turismo pegoulle unha revolución ao turismo de Galicia que aínda estamos desfrutando hoxe en día”, remarcou, valorando que o “desfrutaba”, pero aínda así cando lle pediu que volvera ao seu concello para ser alcaldesa “fíxoo sen dubidalo”.
CHAMAMENTO Á “UNIDADE” PARA OBTER A MAIORÍA ABSOLUTA
Pola súa banda, a secretaria xeral Paula Prado augurou que despois das eleccións municipais de 2027, o PPdeG terá aínda máis alcaldesas e Nava Castro “seguirá sendo unha delas”. Os populares xa suman 31, a formación con maior número de Galicia, seis delas na provincia de Pontevedra —Marín, Mos, Oia, Salvaterra de Miño, Forcarei e Ponteareas—. “Demostran que somos o partido das mulleres e das mulleres que gobernan”, salientou.
Así mesmo, Prado subliñou que o Goberno de Rueda vai aprobar os Orzamentos autonómicos por 17ª vez consecutiva en tempo e forma e serán “os máis altos da nosa Historia, cun reforzo sen precedentes do gasto social”, e ademais “non se esquecerán de Ponteareas”.
Por último, a secretaria xeral do PPdeG lamentou que o PSOE galego estea “disposto a todo con tal de defender a Sánchez”, mesmo a insultar, como fixo esta semana unha deputada autonómica da provincia, Paloma Castro, que “en lugar de condenar a corrupción, decidiu burlarse da saúde do senador do PP que interpelou a Sánchez na Comisión”. “Pero segue sen dimitir. Para eles todo vale con tal de non pedir perdón”, dixo.
Mentres tanto, o BNG evitou o xoves pedir explicacións a Sánchez no Senado, demostrando que é “moi mansiño en Madrid pero moi bravo en Galicia”, onde nas últimas semanas se dedicou a producir “a súa propia película de terror”, con actuacións “como os ataques violentos que en Ponteareas coñecen ben”, xa sexa “instrumentalizando as reivindicacións da cidadanía ou directamente insultando a quen non pensa como eles”. “Todo lles vale porque a súa estratexia é a conflitividade social, a manifestación e o alboroto”, concluíu Prado.
NAVA CASTRO E COMO “GOBERNAR CON XENEROSIDADE”
O presidente provincial, Luís López indicou que “Ponteareas non precisa gastar inxentes cantidades de cartos en promoción, como fan outros concellos”. “Ponteareas non necesita chamar a atención con insultos nin con bufonadas para ver se ocupa un par de minutos nunha tertulia. Ponteareas non necesita chamar a atención para facerse un oco no mundo, porque xa ten a Nava Castro, porque Nava xa pon a Ponteareas no mapa”, precisou.
“Ela sábeo, e non contenta con ser a mellor embaixadora do seu concello, é a mellor garantía do seu futuro. De aí a reforma do mercado de abastos, a futura biblioteca, a nova residencia de artistas, as novas pistas de atletismo e vestiarios nas Rabadeiras, e a recuperación da avenida da Constitución. Nava chegou á Alcaldía cun lema brillante que dicía ‘reseTEA!’ e o que está a conseguir é algo máis que un reseteo, é unha revolución para os seus veciños e veciñas, e este partido vaino garantir durante moitos anos”, subliñou Luís López.
Así mesmo, o dirixente popular lembrou que coñecía xa a Nava por ser durante tantos anos o rostro do éxito turístico de Galicia e de Rías Baixas. “Pero como presidente da Deputación, sendo ela deputada, descubrín nela unha cualidade que se bota moito de menos na política de hoxe: a xenerosidade. Nava brilla sen forzar nada nin xesticular moito, sabe facer que todos se sentan importantes, sabe abandeirar as causas do seu municipio sen quitarlle o foco á xente, como coa plataforma N-120”, indicou.
“En todo caso, como presidente provincial, ao que aspiro en Ponteareas en 2027 está moi claro: eu quero que a Nava non lle fagan falta socios. Eu quero que só precise ao PP. Aos que coa túa xenerosidade te levarán á maioría absoluta en 2027. Ese é o obxectivo”, finalizou Luís López.
