O PPdeG reclama ao Goberno central que “deixe as escusas” e, ante os ataques do lobo, apoie aos gandeiros, que se viron afectados pola decisión do Ministerio para a Transición Ecolóxica e o Reto Demográfico de suprimir as partidas orzamentarias destinadas a compensar os danos ocasionados por este animal. Unha circunstancia “especialmente relevante” en Galicia, “á que lle endebedan 12 millóns de euros correspondentes aos exercicios orzamentarios de 2022, 2023 e 2025”, advirten os deputados galegos no Congreso.
Nunha batería de preguntas rexistrada polos populares lémbrase que “en comunidades autónomas como Galicia a presenza do lobo ibérico constitúe desde hai anos un factor de crecente preocupación para o sector”.
Aínda así, o Executivo de Pedro Sánchez decidiu unilateralmente, en decembro de 2025, eliminar o fondo para habilitar medidas preventivas e o pago de indemnizacións por danos do lobo á gandaría, dotado de 20 millóns de euros anuais. “Esta partida decidiron destinala a un programa de incentivos ligado á mobilidade eléctrica”, lamentan os populares.
Na súa resposta aos deputados do Grupo Popular, o Goberno central omite que “en Galicia, só en 2024 e 2025, se rexistrou unha media de 2.019 avisos por ataques desta especie, o que supón un incremento do 72% en relación cos 1.174 avisos de 2021”, inciden os populares galegos. Ese ano, o Goberno de España incluíu, de forma unilateral e arbitraria, ao lobo no Listado de Especies Silvestres en Réxime de Protección Especial (Lesrpe). En paralelo, as reses afectadas aumentaron un 55%, ao pasar de 2.050 en 2021 a unha media de 3.168 nos últimos dous anos, o que supón unha media de nove animais atacados ao día.
Os deputados do PPdeG subliñan que “a gandaría extensiva desempeña un papel fundamental no mantemento da actividade económica, na fixación de poboación e na xestión sostible do territorio en amplas zonas do medio rural”. “Os ataques de lobo ao gando”, inciden, “seguen xerando un importante impacto sobre as explotacións gandeiras”, ata o punto de que “o sector vén reclamando desde hai anos mecanismos de compensación suficientes e eficaces que permitan garantir a convivencia entre a conservación da fauna silvestre e a viabilidade económica” da súa actividade.
Ante os datos, desde o PPdeG cuestionan a decisión do Goberno central de deixar “a un lado aos gandeiros e non ofrecerlles garantías para sufragar os danos causados ante os ataques do lobo”. “O Ministerio escúdase en que é coherente o anterior modelo de xestión, que blindou a protección do lobo sen ter en conta, como é habitual no Executivo de Sánchez, o criterio das comunidades autónomas”, engaden.
ACTITUDE ARBITRARIA DO GOBERNO DE ESPAÑA
Neste sentido, cómpre lembrar que Galicia e outras 13 autonomías enviaron recentemente unha carta á comisaria europea de Medio Ambiente, Resiliencia Hídrica e Economía Circular Competitiva, Jessika Roswall, denunciando a actitude arbitraria do Goberno central, que insiste na súa intención de declarar o estado de conservación do lobo como desfavorable, cando os datos científicos indican o contrario.
No caso de Galicia, o último censo da especie, elaborado polo Goberno autonómico co máximo rigor técnico, reflicte que en Galicia habitan 93 mandas de lobo e a súa presenza esténdese en máis do 90% do territorio, polo que o seu estado de conservación é favorable.
