A man tendida do PPdeG choca, unha vez máis, contar o muro do bloqueo institucional do BNG”, sinalou, esta mañá, o portavoz do Grupo Parlamentario Popular, Alberto Pazos, tras a negativa dos nacionalistas a sentarse a debater sobre a proposta de actualización do Plan xeral de normalización lingüística.
Para Pazos, a decisión do BNG de autoexcluírse da proposta que a semana pasada trasladou o Grupo Parlamentario Popular ao resto de partidos da Cámara para fixar un calendario de reunións de traballo arredor deste documento é unha mostra máis de que o BNG prefire “atrincheirarse na confrontación e no non polo non”. A reunión co Grupo Socialista e con Democracia Ourensana terá lugar mañá mércores.
Neste senso, o portavoz popular avogou por unha política lingüística de consenso para afrontar os retos do presente e do futuro da nosa lingua. Puxo en valor o aval técnico e institucional co que conta o documento, polo que lamentou “a falta de altura política de quen pensa que o galego é da súa exclusiva propiedade” e incidiu en que a lingua non “é patrimonio privativo de ningún partido político”. “Os nacionalistas desbotaron un documento de 400 páxinas en menos dunha hora. Novo récord de lectura rápida”, apuntou Alberto Pazos.
O portavoz popular instou ao BNG a que “non enrede” e recordoulle que foro para debater as estratexias, os plan e as leis é o Parlamento de Galicia: “Se Ana Pontón quere falar do pacto da lingua, mañá aquí ten unha oportunidade e un lugar”.
COMPARECENCIA DE UNIÓNS AGRARIAS
Así mesmo, o portavoz popular informou de que o vindeiro martes, 28 de xullo, Unións Agrarias comparecerá na Comisión non permanente especial de estudo sobre o prezo do leite. “Para nós era un obxectivo irrenunciable deixar este traballo encamiñado e escoitar ao que foi o impulsor e motor inicial desta comisión”, dixo Pazos.
Tras lamentar o voto en contra dos nacionalistas á convocatoria desta xuntanza, fixo fincapé na importancia desta comparecencia antes do parón estival, xa que, ademais de demostrar que as prioridades do rural galego son as que “marcan a axenda política e non ao revés”; é clave para continuar un traballo que ten como obxectivo garantir uns prezos xustos na orixe e asegurar o futuro das nosas explotación gandeiras.
Para rematar, aproveitou a rolda de prensa para trasladar as condolencias do Grupo Parlamentario Popular polo pasamento de Javier López, secretario de organización, administración e área interna do sindicato.
