O presidente do PPdeG, Alfonso Rueda, reivindicou hoxe o proxecto do PP de Lugo como “única alternativa” fronte ao “escándalo permanente” no que está inmerso o PSdeG e ao “silencio hipócrita” do BNG ante un ‘caso Tomé’ que evidencia que “o goberno provincial non traballa polos lucenses porque dedica o seu tempo a ocuparse dos seus propios escándalos”.
Durante a súa intervención no pincho de Nadal organizado polo partido na provincia e no que tamén participaron a súa presidenta, Elena Candia, e a secretaria xeral do PPdeG, Paula Prado; o líder dos populares galegos criticou a situación na que se atopan os dous partidos que a día de hoxe seguen gobernando en coalición tanto a Deputación como o Concello.
“Por un lado, temos a un PSdeG sumido nos escándalos cun José Tomé que dimite pero non moito, cun secretario xeral do partido que comparece para non render contas e con medio partido asinando manifestos en contra doutro medio. Mentres tanto, os seus socios do BNG fan o que fan sempre cando lles toca aos seus socios: calar e outorgar”, afirmou.
Rueda asegurou que todo isto ten que acabar canto antes polo ben dos veciños de Lugo e dirixiuse a todos eles para subliñar que o Partido Popular é a alternativa que necesitan para que se fagan ben as cousas. Algo do que puxo como exemplo a aprobación dos Orzamentos de 2026 onte no Parlamento.
Unhas contas nas que Lugo volve ser a provincia con máis gasto por habitante e prevé investimentos na cidade como a estación intermodal, a ampliación do polígono das Gándaras ou a reforma integral do centro de saúde da Milagrosa. Ao que hai que engadir as 600 vivendas públicas xa en marcha e as 1.200 para as que se porá á súa disposición solo no Sagrado Corazón.
“Aí está o noso plan para Galicia e para Lugo”, concluíu o presidente do PPdeG facendo un chamamento aos seus a facer valer que son “a alternativa” e poñer en valor todo o feito coa mirada posta nas eleccións municipais de 2027.
UN CASO QUE ESTÁ A DEBILITAR Á INSTITUCIÓN PROVINCIAL
Na mesma liña, a presidenta do PP lucense, Elena Candia, condenou o silencio do PSdeG e, especialmente, da secretaria de Organización do PSOE lucense e deputada provincial ante as últimas informacións sobre o caso de presunto acoso sexual por parte de José Tomé nas que se evidencia que era coñecedora: “É unha vergoña”. Nese sentido, considera que Pilar García Porto “debería ter dimitido por silenciar estes feitos vergoñentos que supoñen silenciar á vítima”.
A xestión por parte do PSdeG é “bochornosa: á falta de explicacións hai que sumar as súas propias contradicións, as leas internas e os escándalos a nivel nacional”. Pero, ademais, o caso “está a debilitar á institución provincial” onde seguen a gobernar tanto Tomé coma García Porto apoiados polo BNG”.
“Hai que lembrar o papel dos nacionalistas é determinante: o BNG mantén as súas responsabilidades de goberno: din unha cousa, pero fan outra. É unha actitude totalmente hipócrita” tendo en conta que “son os primeiros abandeirados contra o machismo”. Candia trasladou a súa solidariedade coas afectadas e convidou ao resto de forzas políticas a poñerse do lado das vítimas.
ELENA CANDIA: “O GOBERNO DE SÁNCHEZ CONDICIONA O FUTURO INDUSTRIAL DA PROVINCIA”
A dirixente provincial presidiu previamente a reunión da Xunta Directiva Provincial onde tamén explicou que “a Xunta de Galicia presentou alegacións ao borrador da futura planificación eléctrica por parte do Goberno do Estado” que, ademais de chegar tarde, “non recolle ningún investimento que permita a creación de novas infraestruturas de transporte eléctrico e reforzos para a zona centro e oeste da provincia” ou proxectos de almacenamento vinculados á eólica mariña.
Concretamente, o Goberno galego reclama o incremento dos investimentos en Galicia, atender as necesidades enerxéticas das iniciativas empresariais proxectadas para os vindeiros anos e ter en conta ás CC.AA.
Candia advirte que “a política enerxética do Goberno de Sánchez condena a Lugo a quedar sen medianas e grandes empresas a curto – medio prazo”. En relación a proposta de planificación da rede de transporte eléctrico para o período 2025-2030 presentada polo Estado, asegura que “frea o futuro industrial da provincia e o desenvolvemento económico do noso territorio”, subliñou durante a reunión da Xunta Directiva Provincial celebrada antes do tradicional pincho de Nadal.
E engade que se trata dunha “nova discriminación a Lugo e a Galicia que se estenderá durante 5 anos” toda vez que “a nosa Comunidade achega o 8,8% ao mix eléctrico, pero o Goberno de Sánchez só lle asigna o 2,8% do investimento total e só un 1,6% para acometer novos investimentos ou actuacións”.
