9 de decembro de 2022. A Comisión 1ª do Parlamento de Galicia aprobou hoxe, sen o apoio de BNG nin de PSdeG, o ditame do proxecto de Lei de medidas urxentes para a redución da temporalidade no emprego público en Galicia, cuxo “obxectivo é reducir a taxa de interinidade por baixo do 8 por cento e facelo atendendo ao marco legal europeo, aclarando as eivas e imprecisións da lexislación estatal”, manifestou o viceportavoz do Grupo Popular, Alberto Pazos.
Este novo texto lexislativo, que agora queda pendente da súa aprobación definitiva en sesión plenaria, busca conciliar dúas circunstancias: a lexítima reivindicación dos funcionarios eventuais, que demandan estabilidade profesional; e a obriga legal de desenvolver este proceso de estabilización atendendo aos principios de igualdade, mérito e capacidade.
Alberto Pazos lamentou que BNG e PSdeG se puxeran “de perfil ante esta nova lei dirixida a apoiar aos traballadores interinos, o que supón apoiar a mellora dos servizos públicos e o diálogo construtivo entre a administración e os representantes sindicais”.
ESTABILIDADE ÁS PLANTILLAS
“Cumprimos o mandato de mellorar as condicións laborais do persoal autonómico; melloramos a atención aos cidadáns, dotando de estabilidade ás plantillas; e facémolo dentro dos prazos conferidos pola Unión Europea”, concretou o viceportavoz popular, quen manifestou que “non hai razóns obxectivas que xustifiquen non apoiar este proxecto lexislativo” por parte dos grupos da oposición.
Neste sentido, Pazos lembrou que “todo o proceso de elaboración desta lei afrontouse cunha clara vontade de diálogo e con absoluta lealdade institucional”. En consecuencia, o ditame incorpora directamente 14 emendas dos grupos parlamentarios (7 do Grupo Popular, 6 do BNG e 1 do PSdeG), ademais doutras dúas transaccións entre o Grupo Popular e o BNG.
