O PPdeG pon de exemplo a “política que serve” de Galicia como “un espello” da que debería exercer o Goberno de Sánchez

Os representantes do PPdeG, á súa chegada á 27ª Interparlamentaria do Partido Popular en Sevilla, puxeron de exemplo hoxe a “política que serve” de Galicia como “un espello” da que debería exercer o Goberno de Pedro Sánchez.

“Imos seguir demostrando que a Galicia que goberna é un exemplo para o resto de España”, sentenciou a secretaria xeral, Paula Prado, que encabeza a delegación de máis de medio cento de parlamentarios do PPdeG, “o partido galego maioritario no Parlamento de Galicia, no Congreso, no Senado e no Parlamento Europeo”.

Prado lembrou que o Partido Popular revalidou hai pouco máis dun ano a maioría absoluta, baixo o liderado de Alfonso Rueda, e hoxe Galicia “segue sendo un espello no que o Goberno central debería mirarse cada día”.

“Podemos mirarlle aos ollos aos galegos e ás galegas porque cumprimos co que se nos esixe. Este 2025, a nosa Comunidade suma xa 16 anos consecutivos cos Orzamentos aprobados en tempo e forma, e faino sen sobresaltos, sen estridencias e sen liortas; sendo un exemplo”, subliñou.

Non obstante, Prado lamentou que mentres Galicia cumpre cos galegos, “hai moito que o Goberno de Sánchez non cumpre con todos os españois”: “Vivimos nun país onde funcionar cos Presupostos Xerais prorrogados é o normal e onde dar privilexios a algunhas comunidades autónomas é a forma de perpetuarse no poder, un país onde o presidente e os seus ministros están cercados pola corrupción e non teñen apoio dos seus socios, pero son incapaces de botarse a un lado”.

Por este motivo, a número dous do PPdeG sinalou que “é o momento de que Sánchez e os seus deixen de mirar cara ao independentismo e miren cara a comunidades como Galicia” e tamén é o momento de cumprir cos traspasos de competencias comprometidos, as transferencias de fondos europeos para proxectos estratéxicos ou as melloras en infraestruturas”.

E, se iso non é así, dixo, “debe deixar pasar a un gran presidente como vai ser Alberto Núñez Feijóo”, porque “el si vai saber representar, como dicimos no Partido Popular, a verdadeira política que serve, a mesma coa que Galicia xa goberna”.

O PPdeG salienta a colaboración da Xunta na implantación nos concellos de transporte público durante os meses de verán

As deputadas do Grupo Popular María Deza e Loli Hermelo salientaron hoxe a colaboración da Xunta de Galicia para a implantación nos concellos galegos de transporte público durante os meses de verán, un servizo que o Concello de Sanxenxo volverá a implantar este ano pero que no Concello de Cangas non se levará adiante, a pesar da demanda veciñal existente, pola negativa dos responsables municipais a solicitalo.

Nunha xuntanza celebrada coa Asociación de Veciños de Nerga en Cangas, María Deza explicou que estes servizos “permitiron reducir o uso do vehículo privado e fomentar o transporte público, a favor dunha mobilidade sostible”. En concreto, as persoas usuarias destas liñas de transporte “se poden beneficiar dos descontos e as vantaxes da tarxeta de mobilidade de Galicia, do mesmo xeito que os menores de 21 anos poden facer ata 60 viaxes ao mes de maneira gratuíta coa tarxeta Xente Nova”.

“Será o segundo ano consecutivo co que o Concello de Sanxenxo conta con este servizo, co que conectamos diversos puntos do municipio entre sí e cos servizos de transporte regular de viaxeiros de uso xeral, reducindo de forma considerable a conxestión viaria que existía con anterioridade”, dixo a deputada popular.

DESINTERESE EN CANGAS

Pola súa banda, Loli Hermelo criticou que o Concello de Cangas “non se sume a esta iniciativa da Xunta de Galicia polo desinterese dos responsables municipais, a pesar de que melloraría as posibilidades de transporte dos veciños e de todos os que nos visitan, ao tempo que reduciría considerablemente os problemas de tráfico existentes sobre todo na época veraniega”.

“En concreto, existen varias parroquias que están a demandar de xeito reiterado contar cun transporte público cunha frecuencia axeitada, pero o Concello fai oídos xordos a esta solicitude e poñendo como escusa que é a Xunta a que ten que levar a cabo todas as accións de transporte”, lamentou a deputada popular.

O PPdeG traslada a árbitros, adestradores e directivos do deporte a decisión da Xunta de exercer a acción popular nos procedementos penais relacionados coa violencia no deporte

Os deputados do Grupo Popular Argimiro Marnotes e Noelia Pérez mantiveron un encontro con representantes de árbitros, adestradores e directivos do deporte ourensán para recoller as súas propostas de actuación sobre a violencia no deporte e trasladarlles a decisión do Goberno galego de exercer a acción popular nos procedementos penais nos casos de violencia no deporte que teñan lugar en Galicia.

Nunha xuntanza cos presidentes galego e ourensán de árbitros de fútbol, o presidente de adestradores de fútbol de Ourense e directivos do voleibol ourensán, Argimiro Marnotes e Noelia Pérez incidiron no pleno compromiso da Xunta coa erradicación da violencia no deporte, que agora dará un paso máis coa modificación da lexislación vixente para poder exercer a acción popular en procedementos penais derivados de calquera acto que poida considerarse violencia no deporte. “O obxectivo final é facer do deporte un espazo seguro, libre de violencia e respectuoso cos calores da convivencia e o xogo limpo”, indicaron.

MECANISMOS SANCIONADORES E MEDIDAS DE INTERVENCIÓN

Así mesmo, os deputados populares informaron que, logo da aprobación por unanimidade dunha iniciativa no Pleno celebrado esta semana, a Xunta dará comunicación aos concellos e clubs federados de Galicia dos mecanismos sancionadores e de todas as medidas de intervención e protección previstas nos protocolos existentes dirixidos á prevención da violencia no deporte.

En concreto, entre as medidas que a Xunta impulsará figuran o reforzo das campañas de prevención e sensibilización en todo o territorio galego contra a violencia no deporte; o impulso de protocolos de boas prácticas para proporcionar ás entidades deportivas e organizadores de competicións ferramentas eficaces na prevención da violencia; a intensificación da capacidade sancionadora da Comisión Galega de Control da Violencia, que poderá iniciar de oficio procedementos sen necesidade de denuncia previa; ou a creación de mecanismos electrónicos accesibles para que a cidadanía poida denunciar situacións de violencia ou condutas contrarias ás normas en eventos deportivos.

O PPdeG lembra que o vindeiro 4 de abril remata o prazo de matrícula para acceder ás prazas de escolas infantís da Xunta

Os deputados do Grupo Popular Raquel Arias e José Manuel Mato visitaron a gardería de Sober e salientaron que a provincia de Lugo conta neste momento con case 3.500 prazas para nenos de 0 a 3 anos. Neste sentido, lembraron que o prazo de matrícula para acceder ás prazas ofertadas pola Xunta permanece aberto ata o vindeiro 4 de abril.

Raquel Arias e José Manuel Mato salientaron que “será o cuarto ano consecutivo no que todas as escolas infantís de Galicia son totalmente gratuítas, unha medida pioneira para a que a Xunta dedica máis de 65 millóns de euros este ano e que permite un aforro medio de case 3.000 euros por curso a cada familia”.

REFORZO DA CONCILIACIÓN

“Galicia é co 60,5 por cento a comunidade autónoma coa maior taxa de escolarización en escolas infantís, superando xa amplamente o obxectivo da Unión Europea de chegar ao 45 por cento en 2030 e situándose 15 puntos por enriba da media de España”, manifestaron.

Así mesmo, puxeron en valor a aposta do Concello de Sober pola conciliación en colaboración coa Xunta de Galicia, que vén de financiar a posta en marcha dunha nova escola infantil neste municipio que permitirá duplicar o número de prazas para atender aos nenos entre 0 e 3 anos. Porén, lamentaron que outros concellos, como o de Monforte, rexeiten reiteradamente a axuda da Xunta para a creación de novas prazas en garderías, tal e como lle están a demandar as familias. Na actualidade, na comarca de Lemos existen 218 prazas en escolas infantís.

Así mesmo, os deputados populares afirmaron que a Xunta segue reforzando os servizos de conciliación en toda Galicia, con medidas como o Bono Concilia Familia, que na última convocatoria beneficiou a 15.000 familias; a Tarxeta Benvida, que concede ás familias unha axuda directa para facer fronte aos gastos orixinados polo nacemento dun bebé; ou as preto de 100 casas-niño espalladas por toda a xeografía galega e que permiten un recurso de conciliación en concellos sen escola infantil.

O PPdeG traslada ao sector pesqueiro a súa preocupación polas campañas de desprestixio do mar que se están a realizar

Os deputados do Grupo Popular Gonzalo Trenor e Magdalena Pérez reuníronse cos patróns maiores das confrarías de Porto do Son, Portosín e Lira para trasladarlles a súa preocupación polas campañas de desprestixio do sector do mar que están a levar adiante con intereses partidistas. “Hai pouco máis dun ano tomaron como escusa o vertido de pellets que chegou ás nosas praias e agora utilizan demagoxicamente o proxecto de Altri en Palas de Rei para difamar sobre a calidade dos nosos produtos”, lamentaron.

Nunha xuntanza na que tamén participou o alcalde de Porto do Son, Luis Oujo, Gonzalo Trenor e Magdalena Pérez analizaron cos representantes das confrarías a situación do sector do mar en Galicia, “no que se abre unha nova etapa coa recente designación do novo comisario de Pesca e Océanos da Unión Europea, Costas Kadis”. Neste sentido, avogaron porque “se aposte por un desenvolvemento pesqueiro sostible, compatibilizando o traballo dos pescadores co respecto polo medio ambiente, porque os galegos somos os primeiros interesados en coidar os recursos marítimos existentes”.

Porén, os deputados populares manifestaron a súa preocupación aos representantes das confrarías polo ruído e as campañas que se fan desde determinados grupos políticos e as súas organizacións satélites que prexudican a boa imaxe dos produtos pesqueiros galegos e de todo o sector relacionado co mar.

“Resulta lamentable que se utilicen accidentes como o da chegada dos pellets ás nosas praias ou agora o proxecto de Altri para sementar dúbidas respecto da calidade dos produtos galegos e bo estado das nosas augas”, sinalaron os deputados populares, quen trasladaron aos responsables das confrarías que “seguiremos traballando, como o viñemos facendo ata agora, por manter e defender a boa imaxe da pesca galega, facendo todo o posible con contrarrestar estes bulos que tanto mal poden facer a este sector”.

O Parlamento de Galicia pide que a Xunta preserve o prestixio da FP galega na implementación do Real Decreto que permite o acceso a persoas sen titulación básica

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG, a través da que se insta á Xunta a que poña en marcha os mecanismos necesarios para asegurar o prestixio da formación profesional galega, preservando a cultura do esforzo na adaptación e implementación do Real Decreto 86/2025, de 11 de febreiro, de avaliación e acreditación das competencias básicas adquiridas por experiencia laboral, por vías non formais de formación e aprendizaxes informais.

A deputada popular Patricia García salientou que “o modelo de formación profesional galega é un exemplo de éxito, tanto polos seus resultados como polo seu nivel de inserción laboral, e un modelo recoñecido, respectado e que conta co aval da comunidade educativa e do tecido produtivo de Galicia”.

DE XEITO INESPERADO E SEN CONTAR COAS CCAA

Porén, lembrou que o Real Decreto 86/2025, aprobado polo Goberno de Pedro Sánchez de xeito inesperado e sen diálogo coas comunidades autónomas, modifica os criterios de acceso ao sistema de formación profesional, permitindo que persoas sen titulación básica poidan acceder acreditando unicamente competencias mínimas en lingua, matemáticas e dixitalización.

“Non cuestionamos a necesidade de abrir camiños para recoñecer aprendizaxes por vías non formais, pero non pode facerse a costa de desvirtuar o modelo baseado na cultura do esforzo, que é o que lle da valor a unha titulación”, indicou a deputada popular.

Neste sentido, apuntou que “se desvirtuamos os estándares corremos o risco de desvirtuar a FP, de perder a confianza do tecido produtivo e de prexudiciar aos propios estudantes, que poden verse atrapados nun sistema que non lles ofrece unha formación real”.

Para rematar, Patricia García manifestou que “non se pode improvisar coa FP, nin abrir a porta á desvalorización das titulacións, nin ao desprestixio dun modelo que funciona”, polo que considerou “razoable que Galicia poida adaptar a normativa do Estado sen comprometer a excelencia nin o modelo propio; que se garantan criterios claros, esixentes e xustos que aseguren a igualdade de oportunidades, pero tamén a calidade formativa; e que todo isto se faga respectando as competencias autonómicas e contando coa comunidade educativa, co profesorado, coas empresas e co alumnado”.

 

O Parlamento de Galicia pide ao Goberno central que desbloquee e complete a tramitación do Estatuto do Artista

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno central que desbloquee e complete a tramitación do Estatuto do Artista, tal e como foi acordado en 2018, por unanimidade, no Congreso dos Deputados. “Sete anos e cinco ministros de Cultura despois, o documento final segue sen ver a luz, e seguen abertas frontes nos eidos fiscal, laboral e da saúde, algunhas delas referidas concretamente ás rebaixas e ás deducións no IVE e no IRPF”, manifestou a portavoz popular de Cultura, Carmen Pomar.

“Pouco despois da chegada de Pedro Sánchez á Moncloa, o 6 de decembro de 2018 o Congreso aprobou o informe para a elaboración dun Estatuto do Artista, un documento que foi desenvolvido pola Subcomisión de Cultura e contou co respaldo unánime de 337 deputados no Pleno”, lembrou a portavoz popular. En concreto, este informe recolle un total de 75 propostas dirixidas a adecuar a regulación que afecta aos autores, artistas e traballadores da cultura para facer máis sostible a súa actividade.

MEDIDAS PENDENTES

Carmen Pomar sinalou que “as e os traballadores do sector cultural tiveron que esperar case catro anos e medio para coñecer as primeiras medidas do Goberno de España que pretenden desenvolver as 75 bases do Estatuto do Artista”. Ademais de estar pendentes medidas referidas á rebaixa e ás deducións no IVE e o IRPF, tamén segue sen ter solución o problema do traballador por conta propia, unha demanda fundamental e moi importante do sector que segue a solicitar unha cota de autónomos adaptada á súa actividade intermitente.

Outras medidas pendentes de resolver fan referencia á dedución de gastos; ás prestacións da Seguridade Social en caso de embarazo ou maternidade; á percepción simultánea de pensión de xubilación e realización de actividades; á ampliación do sistema de representación sindical; á adaptación do IAE á realidade social e cultural; á regulación cos menores de 16 anos; á modificación das regras de cómputo da cotización para a xubilacións e das modalidades na mesma; ás medidas de saúde laboral; ás medidas en materia de transición profesional; ou á consideración dos dereitos de autor como rendementos derivados da propiedade intelectual, nova categoría dentro dos rendementos.

“Moitas medidas sen aprobar pola parálise na que o Goberno de Pedro Sánchez ten sumido ao Estatuto do Artista e que, desde logo, non so únicas, xa que tamén están enriba da mesa as compensacións polo cese de actividade”, indicou a portavoz popular, quen criticou que o Goberno de España “está deixando de lado ao sector cultural e aos seus traballadores, que, ademais da inestabilidade propia do sector, están sumidos nun inferno fiscal que non contribúe a que a súa situación mellore”.

Paula Prado: “O BNG foi, é e sempre seguirá sendo o partido do ‘non’ ao futuro de Galicia”

A secretaria xeral do PPdeG, Paula Prado, asegura que o BNG “foi, é e sempre seguirá sendo o partido do ‘non’ ao futuro de Galicia” e censura que o independentismo galego leve décadas “envelenando a política galega” cuns postulados propios de “quen nunca tivo aspiración de gobernar, senón que só busca destruír e intoxicar”.

Facendo un repaso ao pasado recente e tirando de hemeroteca, a número dous dos populares galegos recordou o oposición do “Bloque Negacionista Galego” a Alcoa, a Sogama, a Citröen, á OTAN, á AP-9, a Finsa, ao bilingüismo, á caza, ás minas de Touro e san Fiz, a Inditex, a Ence, ás conserveiras, ás granxas extensivas, á Garda Civil e á Policía Nacional, aos eólicos e a Altri.

“Pensaron nalgún momento no dano que lle fixeron a Galicia en xeral e ao emprego dos galegos e galegas en particular? Non. O único no que pensaron foi e segue sendo no rédito electoral que poden obter e en como afondar na súa estratexia de oposición”, concluíu asegurando que “non todo vale e moito menos o ‘non’ a todo”.

A secretaria xeral do PPdeG centrou precisamente a súa intervención no ‘non’ da esquerda ao proxecto de Altri. Unha negativa que, tal e como recordou, non se daba no pasado: “Hai tres anos presentamos no Parlamento unha iniciativa coa que buscabamos que todos os partidos políticos nos uníramos na defensa da instalación desta planta na provincia de Lugo e foi aprobada por unanimidade do PPdeG, o PSdeG e o BNG. Con 70 votos a favor e cero en contra”.

No debate desa iniciativa a deputada socialista Patricia Otero reclamaba ao Goberno galego que “se asegure de que Altri se instala na nosa comarca” e comprometíase a “traballar entre todos para conseguir que os fondos Next Generation cheguen a este proxecto que é fundamental”. Pola súa banda, Daniel Castro, deputado do BNG, afirmaba: “Calquera proxecto que cumpra toda a lexislación, que se instale en calquera parte do país… Nós seremos os primeiros en alegrarnos”.

Esta non sería a única iniciativa polo PSOE e o BNG neste sentido, pero, tal e como defendeu Paula Prado, unha vez pasaron as eleccións e agora que ese mesmo proxecto está cada vez máis preto de ser unha realidade, a esquerda “volve aos bulos e aos cambios de opinión”. Por iso pídelle a ambos que “expliquen por que en tan pouco tempo pasaron de apoiar a Altri a querer boicotear a súa instalación”.

“No PPdeG, en cambio, dixemos, dicimos e seguiremos dicindo ‘si’ a esta e a todas aquelas iniciativas que fagan que Galicia prospere”, remarcou explicando que “a Galicia que goberna é sinónimo dunha Galicia que aproveita e xera oportunidades, que desenvolve todo o seu potencial e avanza cara o futuro sen medo nin límites”.

INTERPARLAMENTARIA DO PARTIDO POPULAR EN SEVILLA

A secretaria xeral do partido aproveitou para anunciar que Galicia estará “moi ben representada” esta fin de semana na Interparlamentaria que o Partido Popular celebra en Sevilla, á que asistirán máis de medio cento de representantes do PPdeG.

Con Alberto Núñez Feijóo e Miguel Tellado á cabeza, a representación galega tamén inclúe ao voceiro do partido no Parlamento de Galicia, Alberto Pazos, que intervirá o sábado nunha mesa redonda, e á propia Paula Prado. Todos eles demostrarán que o PPdeG é “o partido galego maioritario no Parlamento, no Congreso dos Deputados, no Senado e no Parlamento Europeo”.

O Grupo Popular pide a BNG e PSdeG que deixen de mentir coa quita da débeda porque nin Galicia vai dispor de máis cartos para investir nin o Goberno central a calculou en base á poboación axustada

A viceportavoz do Grupo Popular, Cristina Sanz, pediu hoxe no Pleno do Parlamento galego a BNG e PSdeG que “deixen de mentir coa quita da débeda, porque nin Galicia vai dispor de máis cartos para investir en servizos públicos nin o Goberno de Pedro Sánchez a calculou en base á poboación axustada”. Así mesmo, pediu ao Goberno central que “libere os case 1.600 millóns de euros que lle ten retidos a Galicia co retraso das entregas a conta e reúna con urxencia ás comunidades autónomas para acadar un acordo sobre financiamento”.

Cristina Sanz criticou que BNG e PSdeG “falan dunha quita da débeda cando en realidade o que se fai é transferir e cambiar de mans esa débeda, facendo que os galegos teñamos que pagar unha parte importante da débeda xerada por outros territorios incumpridores na xestión dos recursos públicos, como Cataluña”.

Así mesmo, negou que coa condonación da débeda Galicia disporá de 4.000 millóns de euros máis de recursos, “xa que esta operación non xera capacidade adicional de gasto para as comunidades autónomas, o que fará imposible investir eses cartos en vivenda, sanidade, educación ou dependencia”. “Se con este acordo un galego pasa a deber 220 euros máis, estamos ante unha ruína de negocio para Galicia”, afirmou.

NOVO SISTEMA DE FINANCIAMENTO

A viceportavoz popular rexeitou, ademais, que o importe da quita da débeda estea calculada en base á poboación axustada de Galicia. “Non se nos están asignando os recursos que nos corresponderían pola poboación axustada, o 6,7 por cento; nin tan sequera por poboación, o 5,5 por cento; senón que a cantidade ofertada supón o 4,8 por cento, porcentaxe inferior a calquera criterio que se escolla”, explicou.

“Se de verdade a BNG e PSdeG lles preocupa o financiamento de Galicia, pídanlle ao Goberno de Pedro Sánchez que cumpra coa súa obriga constitucional de presentar o seu proxecto de orzamentos no Congreso; que actualice as entregas a conta, xa que o Goberno central ten retidos a Galicia case 1.600 millóns de euros; e que reúna con urxencia a todas as comunidades autónomas para acadar un acordo sobre o financiamento que asigne os recursos de maneira equilibrada e suficiente entre todas as administracións”, manifestou.

Cristina Sanz lembrou que “Galicia necesita un sistema de financiamento que atenda os custes de prestación dos servizos públicos, que obxectivamente son máis caros aquí polas nosas características de dispersión e envellecemento da poboación”.

O Parlamento galego solicita dar traslado a concellos e clubs federados dos mecanismos sancionadores e de prevención previstas nos protocolos contra a violencia no deporte

O Pleno do Parlamento de Galicia aprobou hoxe por unanimidade unha proposición non de lei, logo dunha transacción entre o Grupo Popular e o PSdeG, a través da que se solicita dar traslado aos concellos e clubs federados de Galicia dos mecanismos sancionadores e de todas as medidas de intervención e protección previstas nos protocolos existentes dirixidas á prevención da violencia no deporte.

“Queremos un deporte galego libre de violencia, que siga sendo un instrumento de cohesión social, de saúde, de aprendizaxe e de futuro”, manifestou o deputado popular Argimiro Marnotes, quen apuntou que “para iso temos ferramentas que se deben mellorar e poñelas en común”.

MARCO NORMATIVO SÓLIDO E FUNCIONAL

A proposición non de lei aprobada inclúe a solicitude para que a Xunta continúe impulsando as campañas de prevención e represión da violencia e das condutas contrarias á boa orde deportiva; o protocolo de boas condutas, proporcionando ás entidades deportivas e ás persoas organizadoras de competicións deportivas os datos e os consellos que poidan facilitar a prevención da violencia; as competencias sancionadoras, iniciando de oficio pola Comisión Galega de Control da Violencia, na ausencia de denuncia, todos aqueles procedementos dos que teña coñecemento e atenten contra as boas prácticas en materia deportiva; e os mecanismos para que a cidadanía poida por vía electrónica achegar facilmente todas as denuncias de situacións de violencia ou contrarias ás normas que se produzan en eventos ou competicións deportivas.

Argimiro Marnotes asegurou que “Galicia conta cun marco normativo sólido e funcional para previr e combater as condutas violentas no deporte” e concretou que a Lei do Deporte de Galicia establece mecanismos de análise, intervención e sanción ante calquera conduta violenta. “Unha norma que, tal e como anunciou onte o conselleiro na súa comparecencia neste Parlamento, se modificará para que o Goberno galego poida exercer a acción popular nos procedementos penais por violencia no deporte, na forma e condicións establecidas pola lexislación procesual”.

Así mesmo, manifestou que “a Xunta traballa na prevención e na formación a través do programa XOGADE, que ten como obxectivo non só a práctica deportiva dos escolares, senón a educación en valores como o respecto, o xogo limpo, a convivencia e a participación”. Neste sentido, destacou que XOGADE pechou a súa última tempada coa cifra récord de cerca de 150.000 nenos e nenas mutualizados, o que supón o 60 por cento de todos os escolares galegos entre os 6 e os 16 anos.

O deputado popular tamén se referiu á posta en marcha dun proxecto específico coa Unión de Federacións Deportivas de Galicia centrado en tres liñas claras: información, sensibilización e formación, “porque combater a violencia non é só castigar, é sobre todo educar e anticiparse”.

E, por último, dixo que o Protocolo de protección de menores, aprobado o 14 de maio de 2024, é “un documento pioneiro que obriga a clubs e federacións a nomear unha persoa delegada de protección, responsable de garantir a seguridade dos menores”.