Santiago, 15 de decembro de 2017.- O deputado do Grupo Popular Moisés Blanco salientou hoxe “a axilidade e planificación” realizada pola Xunta de Galicia declarando a prealerta e alerta pola seca e poñendo axudas a disposición dos afectados en Galicia.
Moisés Blanco lembrou que a Consellería do Medio Rural publicou o pasado 2 de novembro, unha vez que todas as demarcacións das concas hidrográficas de Galicia foron declaradas en situación de emerxencia, a convocatoria dunha liña de axudas. Neste momento, os técnicos desta Consellería están a avaliar as 678 solicitudes realizadas, que, no caso de ser finalmente concedidas, teñen de prazo para a súa xustificación ata o vindeiro 30 de setembro de 2018.
EXPLOTACIÓNS DE AUTOCONSUMO
Segundo se recollía na orde da convocatoria, todos os solicitantes deberán estar inscritos no Rexistro Xeral de Explotacións Agrarias de Galicia (Reaga), polo que “están incorporadas aquelas que venden nos mercados locais os excedentes da produción dedicada ao autoconsumo e que están dados de alta neste rexistro”, sinalou o deputado popular.
“Esta convocatoria de axudas ten unha visión de futuro para conseguir que as explotacións agrarias poidan dotarse dos mecanismos de abastecemento necesarios ante adversidades climáticas como as que vivimos nos últimos meses”, concretou.
Deste xeito, apuntou que “a cantidade máxima subvencionable é de 5.000 euros, suficiente para poder satisfacer a demanda de infraestruturas”.
