Santiago, 7 de novembro de 2017.- O deputado do Grupo Popular Alberto Pazos cualificou hoxe o proxecto de Lei de espectáculos públicos e actividades recreativas, que continuará a súa tramitación parlamentaria logo de superar hoxe no Pleno o debate de totalidade, de “necesario, útil e consensuado”.

Pazos demandou aos grupos da oposición un “espírito construtivo” no debate en comisión e ponencia do texto lexislativo, “que nos permita alcanzar un acordo parlamentario para facer a mellor lei posible en beneficio de todos”.

Alberto Pazos comezou a intervención felicitando ao Goberno “por conseguir modelar este texto lexislativo e que constitúe unha magnífica base sobre a que agora nos corresponde traballar aos distintos grupos parlamentarios”.

MARCO XURÍDICO CLARO E ADECUADO

En concreto, o deputado considerou este texto lexislativo “necesario, porque o conxunto da sociedade galega, e especialmente os sectores mais directamente afectados por esta normativa, demandaban un marco xurídico claro, adecuado á realidade social actual, e capaz de garantir a protección e a conciliación dos distintos dereitos e intereses en relación aos espectáculos públicos”.

“Tamén é un proxecto útil, pois se centra no substancial, abandonando calquera pretensión de establecer un innecesario intervencionismo da administración autonómica, sin que isto supoña renunciar a establecer un marco lexislativo claro, sinxelo, desburocratizado e eminentemente práctico”, apuntou.

Por último, Pazos sinalou que se trata dun proxecto de lei “consensuado, xa que se estableceu cos sectores afectados un auténtico diálogo, fluído e sostido durante un longo período de tempo, que permitiu enriquecer o texto ata chegar ata esta Cámara con un altísimo nivel de consenso co sector”.

NON REGULA A CREACIÓN ARTÍSTICA

En relación á emenda á totalidade presentada polo grupo En Marea, Alberto Pazos asegurou que este proxecto de Lei “nin regula, nin pretende nun regular, a creación artística, e polo tanto dificilmente vai incidir nunha materia sobre a que non se pronuncia en ningún dos seus artigos”.

“Esta lei non regula a creación cultural, polo que os escritores seguirán escribindo, os compositores continuarán compoñendo, os artistas plásticos seguirán creando, e os consumidores de bens culturais seguiremos gozando desas creacións porque non hai nada nesta lei que afecte ou condicione a creación cultural”, asegurou.

O deputado popular explicou que a nova lei “só regula os espectáculos públicos e as actividades recreativas, sexa cal sexa a natureza do espectáculo ou evento: deportivo, lúdico, veciñal, laboral, relixioso, sindical, político ou cultural”.

En definitiva, “esta lei só pretende establecer as condicións para que cando calquera desas actividades se materialicen nun espectáculo público, este se celebre con plenas garantías para todos os que participan ou asisten a ese evento”. “Iso ten moito mais que ver coa liberdade dos individuos, que con calquera clase de censura”, subliñou Alberto Pazos.