22 de novembro de 2022. A portavoz do Medio Rural do Grupo Popular, Elena Candia, afirmou hoxe no Pleno do Parlamento galego que a Xunta está a traballar no borrador do Libro Blanco que recolle o novo marco normativo dos montes veciñais en man común, un documento que será trasladado ao Consello Forestal de Galicia no primeiro trimestre de 2023 para a súa valoración.
Deste xeito, Candia fixo un “chamamento a todos os grupos políticos, á sociedade civil e a todas as entidades que conforman o Consello Forestal para impulsar esta nova normativa nun proceso participativo, aberto e público”.
No debate dunha proposición de lei de iniciativa lexislativa popular de montes veciñais en man común, Elena Candia agradeceu o traballo realizado pola comisión promotora e a súa preocupación polo rural galego.
Candia lembrou “o claro compromiso do Goberno galego de abordar a revisión da Lei de montes veciñais en man común desde un proceso participativo” e anotou que nesta normativa “se bota en falta a altura de miras e a capacidade de poder construír nun momento histórico de Galicia no que o rural cambiou para ben”.
REVISIÓN DA NORMATIVA
“Esa necesidade de revisión desta normativa xa foi evidenciada dentro das directrices do grupo de traballo do Consello Forestal para a revisión do Plan Forestal”, sinalou a portavoz popular, quen se referiu a aspectos que deben ser analizados e revisados como fomentar os deslindes amigables coa posibilidade da arbitraxe da administración, a simplificación de trámites administrativos, evitar ocupacións ilegais, a existencia de xuntas reitoras, priorizar axudas a deslindamentos parciais consensuados entre comunidades ou o apoio á xestión profesionalizada.
Elena Candia apuntou que “na primeira revisión do Plan Forestal, que se aprobou o mes de outubro do pasado ano, xa se avogaba por revisar esta lei de montes en man común, unha cuestións á que tamén se facía referencia no ditame da Comisión Forestal aprobado neste Parlamento”.
“Esta modificación esta prevista levala adiante no período 2021-2025 e, para que o proceso sexa máis garantista e público, a Xunta xa comezou a elaboración dun libro branco que recolla o novo marco normativo”, manifestou Candia, quen sinalou que o Goberno galego levará ese documento ao Consello Forestal no primeiro trimestre do vindeiro ano.
