Santiago, 22 de novembro de 2018.- O Grupo Popular apoiou hoxe a aprobación dunha proposición non de lei a través da que se demanda ao Goberno do Estado que asuma os custes dos suplementos territoriais en relación ás peaxes polo acceso á enerxía eléctrica, si finalmente non prospera o recurso interposto polo Goberno galego contra esta orde do Goberno central.

 

 

A portavoz de Enerxía do Grupo Popular, Marta Nóvoa, lembrou que esta orde estatal afecta a 14 das 17 comunidades autónomas españolas e lembrou “a coherencia do PPdeG ao solicitar que Galicia quede fóra desta orde que asigna os suplementos territoriais tanto ao anterior Goberno do PP como o actual do PSOE”, como quedou de manifesto noutras iniciativas que xa se debateron e aprobaron no Parlamento galego sobre este mesmo tema no último ano.

 

 

Deste xeito, criticou “a falta de lealdade política dos socialistas galegos, xa que cando gobernaba o señor Rajoy votaban a favor de suprimir estes suplementos, pero agora que están no Goberno do Estado se poñen de perfil e non apoian que aos consumidores galegos non se lles repercuta este suplemento eléctrico e sexa o Goberno central quen se faga cargo destes custes”.

 

 

 

 

Marta Nóvoa insistiu que “tanto o Grupo Popular como o Goberno galego non compartimos que uns impostos que gravan o impacto no medioambiente teñan que repercutirse aos consumidores galegos”. “A nosa filosofía é que quen contamina, paga, e esa é a natureza de todos os impostos que se ven afectados por estes suplementos: sobre a contaminación atmosférica, sobre o uso e aproveitamento da auga embalsada e o canon eólico”, explicou.