Santiago, 17 de novembro de 2020.- O Grupo Popular apoiou hoxe no Parlamento a aprobación dunha proposición non de lei para que a Xunta axilice o procedemento necesario para declarar BIC o histórico edificio coruñés coñecido como Casa Cornide. “A nosa posición con respecto á este emblemático edificio é clara e, do mesmo xeito que xa o expresou o conselleiro de Cultura, o Concello vainos ter como aliados para a súa declaración como ben de interese cultural”, incidiu o deputado popular Alberto Pazos.
“Coa declaración como BIC, a Casa Cornide acadaría o máximo grado de protección, polo que os actuais titulares terían a obriga, entre outras, de abrila á visita pública, así como de asegurar o seu mantemento e conservación, tal e como recolle a Lei de Patrimonio Cultural de Galicia”, concretou.
FACER BEN AS COUSAS
Alberto Pazos puxo como exemplo a restitución do Pazo de Meirás ao patrimonio público de que “facendo ben as cousas é posible acadar grandes obxectivos en favor dos intereses dos galegos e do patrimonio público de Galicia”.
Na súa intervención, afirmou que a Xunta avaliará a documentación aportada polo Concello de A Coruña para comprobar que xustifica o valor sobranceiro da Casa Cornide, do mesmo xeito que se fixo coas estatuas do Mestre Mateo”.
Na actualidade, a Casa Cornide é un ben que conta con protección monumental, a máxima prevista no Plan Especial de Protección e Reforma Interior (PEPRI) da Coruña. Esta casa, de estilo barroco e construída polo arquitecto municipal Antonio Fontenla baixo a dirección do enxeñeiro Francisco Llovet, pertenceu a Don Diego Cornide, pai de Don José Andrés Cornide Saavedra y Forgueira, un dos ilustrados coruñeses, nacido en 1734. O edificio é un exemplo das mansión aristocráticas situada na cidade alta coruñesa, que se caracteriza pola calidade da súa construción e o coidado deseño da fachada, de gusto francés.
