O portavoz de Lingua do Grupo Popular, José Luís Ferro, asegurou hoxe no Pleno do Parlamento galego que “o noso modelo lingüístico non é a imposición senón conseguir que a maioría dos galegos que xa coñecen a nosa lingua un paso máis e comecen a utilizala con máis frecuencia e a sentirse orgullosos dela”. “Neste proxecto cabemos e caben todos, chámense como se chamen, naceran onde naceran e falen a lingua que falen, porque temos as portas abertas coa única condición de que respecten aos que se chamen de forma distinta, pensen distinto ou se sintan distintos, pero que estean dispostos a colaborar neste proxecto de igualdade e liberdade”, apuntou.
José Luís Ferro manifestou que “a nosa lingua non é, nin debe ser, algo que entre no debate partidista, senón un ben común que nos une e singulariza que todos debemos defender usando con absoluto coñecemento e normalidade, sen excluír para nada o manexo conveniente doutras linguas”.
TEMPOS PASADOS
Na súa intervención, lembrou que “durante séculos o galego foi violentado no máis íntimo do pobo, transmitindo o sentimento absurdo de que a nosa fala era cousa de xentes de segunda”, pero subliñou que “eses tempos xa pasaron e déronse nun contexto histórico que non se pode xulgar cos ollos da actualidade, porque se así se fixera sería cometer un erro tan grande como querer circunscribir a grandes figuras de Galicia, como Castelao, Curros ou Rosalía, nunha determinada ideoloxía actual”.
O portavoz popular recordou que a Xunta “impulsou un escenario de diálogo constituíndo grupos sectoriais para renovar o Plan Xeral de Normalización Lingüística de 2004, composto por máis de 100 profesionais comprometidos coa nosa fala e poñendo un prazo de 15 meses para rematar os traballos, ao tempo que xa se anunciou unha senda de crecemento orzamentario para seguir impulsando políticas en beneficio da nosa lingua”.
“Mentres vostedes viven nun nacionalismo desintegrador e excluínte, nós estamos nun galeguismo dual, ou de dobre nacionalidade, integrador e incluínte”, manifestou Ferro dirixíndose aos deputados do BNG, para continuar asegurando que “a nosa bancada é galeguista porque nos identificamos coa comunidade na que nacemos, identificámonos coas nosas tradicións, patrimonio cultural e, sobre todo, coa nosa lingua, orgullosos de ser galegos pero sen excluír a ninguén”.
