O deputado do Grupo Popular Roberto Rodríguez asegurou hoxe no Pleno do Parlamento galego que SOGAMA manterá de media o mesmo canon do ano 2023, fixado en 66 euros por tonelada, aos concellos adscritos a esta empresa pública, de xeito que lles repercutirá unha contía moito menor que o custo real que ten o servizo, que rolda os 120 euros.
Roberto Rodríguez explicou que a empresa pública SOGAMA asumiu no último ano e medio un sobrecusto de 39 euros por tonelada pola xestión dos residuos urbanos que recibe procedentes de 295 concellos galegos provocado por decisións unilaterais adoptadas polo Goberno de Pedro Sánchez: a aplicación, desde o mes de xaneiro de 2023, do imposto estatal sobre vertido e incineración, que supuxo 9 millóns de euros de sobrecusto; a orde ministerial, de xullo de 2023, que elimina a retribución que Galicia recibía pola planta termoeléctrica de Cerceda, pese a que tiña dereito a percibila ata 2026 e que tivo un sobrecusto para as arcas galegas de 9,8 millóns de euros; e o imposto estatal de produción de enerxía, que conlevou unha suba dun 7 por cento.
SEN ALEGACIÓNS DOS CONCELLOS
“Nin a Fegamp nin a FEMP alegaron no seu momento contra esta suba provocada polas decisións do Goberno central, pero agora esixen o mantemento das bonificacións e anuncian alegacións á decisión de SOGAMA”, indicou o deputado popular, quen lamentou que “alegarán excluíndo deliberadamente do debate aos 150 concellos gobernados polo Partido Popular, máis que BNG e PSdeG xuntos pese aos seus pactos de perdedores”.
O resultado destas decisións aleatorias do Goberno de Pedro Sánchez foi un encarecemento do custo do servizo que presta SOGAMA en 21,9 millóns de euros no ano 2023, “a pesar de que a tendencia a nivel europeo está a ser a de aprobar unha moratoria á aplicación do imposto sobre incineración porque está a producir efectos contrarios aos pretendidos, xerando maior cantidade de refugallo e obstaculizando a produción de electricidade barata, autóctona, fiable e neutra”, apuntou.
Diante desta situación, Roberto Rodríguez salientou que a Xunta “fará un esforzo supletorio para causar o menor impacto posible das medidas do Goberno de Pedro Sánchez no peto dos galegos: realizará unha aportación extra de 12 euros por tonelada a través do fondo de cooperación local”. Deste xeito, subliñou que, aínda coa actualización proposta por SOGAMA, o canon medio para 2024 seguirá sendo o máis barato de España.
“SOGAMA viuse penalizada polo Goberno socialista fronte a plantas menos eficientes nas que, sobre o papel, se valoriza todo o material recibido, como Nostián ou Serra do Barbanza, que apostan polo modelo húmido-seco, en extinción xa que é contrario ás directrices europeas e que, ademais, resulta notablemente máis custoso para os concellos”, rematou.
