Santiago, 13 de marzo de 2019.-  O viceportavoz do Grupo Popular, Miguel Tellado, criticou este mércores a “hipocrisía” dos socialistas ao propoñer un debate sobre a transferencia de competencias a Galicia logo de nove meses de desprezo á nosa autonomía desde o Goberno Central. Así, ilustrou a súa afirmación con algún dos “agravios” que perpetrou Pedro Sánchez coa Comunidade, con especial atención á proposta dun recorte do 26 por cento dos fondos asignados nos orzamentos xerais do Estado con respecto ao ano anterior.

 

 

Sobre a iniciativa, Tellado lembrou que durante os anos de Goberno Zapatero só se transferían competencias a comunidades gobernadas polo PSOE ou polos nacionalistas; e nos de Goberno Rajoy non se transferiu ningunha competencia a ningunha autonomía, “porque a meirande parte de comunidades estaban intervidas e non podían facer fronte nin ás competencias que tiñan”.

 

Neste punto, incidiu en que “Galicia foi das poucas que puido manter a súa autonomía financeira naqueles anos, esa é a nosa defensa do autogoberno”, para lembrar que nestes meses de Goberno Sánchez só se lle transferiron competencias a Euskadi. “Hipocrisía pura. Nos anos do PP en Madrid as circunstancias non permitiron transferir nada a ninguén. Nos anos do PSOE, hai transferencias só para os amigos”, subliñou.

 

 

 

 

Por outra banda, Tellado lembrou que o PPdeG aspira a máis e mellor autogoberno, conforme ao noso status constitucional de nacionalidade histórica, e se reserva o dereito de valorar se a Galicia lle convén asumir calquera competencia que sexa transferida a outra comunidade autónoma e a establecer as súas propias prioridades neste eido.