Santiago, 3 de marzo de 2021.- A deputada do Grupo Popular Marisol Díaz criticou hoxe a BNG e PSdeG por “propoñer agora cambiar as liñas estratéxicas do Plan de Vivenda de Galicia 2021-2025 cando é un documento que naceu co consenso de todos os axentes implicados neste sector, con medidas que xa probaron a súa eficacia e outras que darán resposta ás novas necesidades, ademais de estar dotado convenientemente de orzamento”.
Porén, apuntou que “poderán emendar a súa falta de achegas facendo suxestións nalgún outro momento, porque este Pacto pola Vivenda é un documento flexible que sempre estará aberto, para atender as necesidades dunha sociedade dinámica”.
Marisol Díaz salientou que o Plan de Vivenda 2021-2025 “é o primeiro documento destas características aprobado coas achegas e a unanimidade de todos os organismos e axentes que participan na promoción, difusión e uso da vivenda, desde promotores e construtores ata consumidores e cooperativas, pasando polos técnicos implicados no deseño e a construción”.
MEDIDAS PROBADAS E NOVAS
“Un pacto que inclúe medio cento de medidas e actuacións, algunhas delas de eficacia probada en convocatorias anteriores e que na súa meirande parte foron creadas nos últimos cinco anos”, engadiu. Así mesmo, dixo que “incorpora medidas totalmente novidosas coas que se pretende dar resposta ás novas necesidades que van xurdindo e que, sen dúbida, continuarán a xurdir como consecuencia da crise económica e social provocada pola pandemia”.
Deste xeito, a deputada popular subliñou a “flexibilidade deste documento, pois permitirá incluír novas medidas para facer fronte ás demandas dunha sociedade que está a mudar a un ritmo nunca visto antes”.
Por último, Marisol Díaz manifestou que o Plan de Vivenda 2021-2025 prevé un investimento de 433 millóns de euros de fondos públicos nos seus cinco anos de vixencia. “Unha importantísima inxección de recursos dirixida a particulares e empresas, coa que o Goberno galego estima que se producirá unha mobilización de máis de 1.000 millóns de euros, contribuíndo ao mantemento de aproximadamente 30.000 postos de traballo”.
INFORME SOBRE O PLAN REHABITA
Por outra parte, no debate doutra proposición no de lei na Comisión 2ª sobre o Plan Rehabita, a deputada popular demandou que o Goberno galego presente no Parlamento ao remate deste ano un informe sobre a execución deste plan de rehabilitación, aluguer e mellora do acceso á vivenda.
