Santiago, 8 de marzo de 2022.- A deputada do Grupo Popular Cristina Sanz criticou hoxe no Pleno do Parlamento galego que o PSdeG “nos pida que retrocedamos ao tempo do bipartito e apliquemos políticas de emprego e igualdade para as mulleres de hai 16 anos”. “Son políticas que teñen caducado, que obedecen a unha realidade que non existe e que, ademais, xa foron xulgadas polos galegos en catro eleccións consecutivas”, subliñou.
“Sospeito que farán esta proposta porque os socialistas galegos están obsesionados con patrimonializar e apropiarse de todas as políticas relativas á igualdade, cando a realidade demostra que desde o PPdeG levamos moito tempo traballando nesta materia”, sinalou a deputada popular, que puxo como exemplo o primeiro Plan autonómico contra a violencia de xénero, aprobado hai 30 anos; a primeira Lei de igualdade de Galicia, de 2004; ou o nomeamento de mulleres en postos de alta responsabilidade política, ata ese momento só ocupados por homes.
NOVA LEI DE IGUALDADE
De cara ao futuro, Cristina Sanz lembrou o anuncio realizado no último Consello da Xunta de impulsar unha nova Lei de igualdade de mulleres e homes, “que terá como un dos seus eixos principais elevar a rango de lei as políticas que nos permitan seguir avanzando na igualdade laboral entre homes e mulleres e no compromiso co emprego feminino de calidade”.
“Esta normativa intentará erradicar fenómenos como o teito de cristal e introducirá a idea de benestar laboral nas empresas, ao tempo que incluirá un Estatuto das mulleres rurais e do mar co que se defenderá o compromiso de atender as súas necesidades nas políticas de emprego autonómico”, puntualizou.
A deputada popular tamén se referiu ao Plan Emprega muller, que contén apoios integrais para o acceso, o mantemento, a consolidación e a promoción profesional das mulleres galegas; as actuacións realizadas en materia de conciliación, coa finalidade de minimizar as dificultades das mulleres para manterse ou volver ao mercado laboral; ou facilitar unha formación accesible, flexible e actualidade en materia de igualdade laboral.
“En definitiva, hai un Goberno galego que traballa, que promove, que escoita e que acerta no impulso de iniciativas no ámbito da igualdade no mercado laboral, polo que non nos pidan nin pretendan que retrocedamos ao pasado”, concluíu.
