Santiago, 27 de marzo de 2019.- O portavoz de Medio Ambiente do Grupo Popular, Gonzalo Trenor, cuestionou hoxe no Parlamento aos deputados socialista sobre “que consigna deron aos seus alcaldes en Galicia para que non se sumaran á rebaixa do 10 por cento do canon de Sogama aprobada pola Xunta e que esta rebaixa repercuta directamente no recibo que pagan os seus veciños”.

 

Gonzalo Trenor considerou esta medida “moi boa para todos os galegos, pero especialmente para a conservación do medio ambiente, xa que permitirá reducir o lixo e incrementar a taxa de reciclaxe”.

 

 

Porén, manifestou que “a inmensa maioría dos concellos gobernados polo PP, as Mareas de Podemos e o BNG se sumaron a esta rebaixa do canon de Sogama, pero sorprendentemente, salvo algunha excepción, os concellos socialistas rexeitaron esta medida e con isto trasladar aos seus veciños unha rebaixa no recibo que pagan polo tratamento dos seus residuos urbanos”.

 

 

 

O portavoz popular lembrou que “Galicia xa conta cun plan de residuos sólidos urbanos, completo e con vixencia ata 2022”. “Fronte á realidade paralela que nos presentan os grupos da oposición, o modelo Sogama é complementario daqueles outros sistemas ou modelos de tratamento que podan implementar as entidades locais, que por mandato legal ostentan a competencia exclusiva sobre a recollida e tratamento de residuos urbanos, domésticos ou asimilados”, apuntou.

 

 

Deste xeito, indicou que “son os propios concellos os que deciden a cantidade de residuos a remitir a Sogama, sen que a súa adhesión implique en modo algún o compromiso de remitir unha determinada cantidade mínima de residuos”.