Santiago, 11 de outubro de 2022.- O Grupo Popular demandará no Pleno da vindeira semana que o Goberno central cumpra o establecido na Lei de dependencia e cofinancie ao 50 por cento a súa aplicación.
Así mesmo, demándase que ofreza á maior brevidade, de xeito continuo e coa máxima transparencia toda a información dispoñible sobre as causas que motivaron o colapso do viaduto do Castro na A-6, ao tempo que activa de inmediato a mesa de seguimento comprometida polo Presidente do Goberno de España.
Ao remate da Xunta de Portavoces, Pedro Puy informou que a orde do día da sesión plenaria da vindeira semana inclúe a comparecencia do vicepresidente primeiro da Xunta e conselleiro de Economía, Industria e Innovación para informar sobre a situación de Galicia respecto da asignación dos fondos europeos en materia industrial.
FRACASO TRAS FRACASO
Neste sentido, Puy lamentou que o reparto dos fondos europeos “acumulan fracaso tras fracaso porque os cartos non chegan aos obxectivos previstos, co que existe o risco de perder estes fondos europeos a pesar dos importantes proxectos cos que opta Galicia”. En concreto, citou a plataforma ideada por Stellantis para fabricar desde Vigo os novos modelos eléctricos do grupo a partir de 2026; a planta de ánodos de grafito para baterías prevista por Showa Denko na Coruña; ou a factoría de fibras téxtiles sostibles proxectada por Altri en Palas de Rei, así como a planta de hidróxeno verde que Reganosa e EDP Renovables proxectan nas Pontes, a fábrica de pneumáticos de Sentury Tire tamén na Coruña, ou a planta da farmacéutica Kern Pharma en Monforte.
O portavoz popular apuntou que a día de hoxe España só ten autorizados 18.000 dos 70.000 millóns de euros das transferencias asignadas pola Unión Europea no marco do Mecanismo de Recuperación e Resiliencia. É dicir, tan só 1 de cada 4 euros, cando o 70 por cento dos fondos destinados a cada país deberían estar asignados ou comprometidos xuridicamente a finais deste ano e o 30 por cento restante ao remate de 2023.
DÉBEDA DE 2.000 MILLÓNS EN DEPENDENCIA
Dentro do apartado de proposicións non de lei, o Grupo Popular demandará ao Goberno central o cumprimento do cofinanciamento do 50 por cento da Lei de dependencia, tendo especialmente en conta o desequilibrio acumulado desde a aprobación desta normativa en 2006. Así mesmo, pedirase que renuncie á imposición unilateral de novas medidas que supoñan o incremento de custes na prestación de servizos públicos de carácter social, en tanto non se alcancen os niveis de cofinanciamento previstos na Lei.
Pedro Puy concretou que a Xunta “está a afrontar o 70 por cento dos gastos en dependencia, fronte a un 30 por cento do Goberno central, cando a aportación debería ser equitativa”. “Este desequilibrio supón que o Goberno de España arrastra cos galegos unha débeda que supera os 2.000 millóns de euros, ao que se engade que o Goberno de Pedro Sánchez pretenda establecer criterios comúns en todo o ámbito nacional para a prestación de determinados servizos que suporían un considerable incremento das achegas realizadas pola Xunta”.
En segundo lugar, o Grupo Popular pedira ao Goberno central que ofreza, á maior brevidade, de xeito continuo e coa máxima transparencia, toda a información dispoñible sobre as causas que provocaron o colapso do viaduto do Castro na A-6, ao tempo que activa de inmediato a mesa de seguimento sobre as medidas que se veñen adoptando en relación co peche desta autovía de conexión de Galicia coa Meseta.
O portavoz popular lembrou o compromiso asumido polo Presidente do Goberno de España ante o Presidente da Xunta de activar esta mesa de seguimento, “pero a día de hoxe aínda non se ten convocado”. “Existen moitas dúbidas respecto das actuacións que se están levando a cabo para facilitar o tráfico de vehículos neste punto, e máis cando representantes do Goberno central avanzan a reapertura á circulación do outro viaduto sen coñecer as causas que levaron ao colapso ao xemelgo ou sen ofrecer toda a información dispoñible nin á Xunta nin aos galegos”, manifestou.
Por último, e dentro do apartado de preguntas ao Goberno galego, o Grupo Popular interesarase polas medidas que a Xunta está a desenvolver en apoio aos comercios de proximidade; polos novos programas postos en marcha en desenvolvemento do Plan de saúde mental de Galicia; ou pola valoración que realiza respecto das actuacións levadas a cabo en relación co Pazo de Meirás.
