O Grupo Popular demandará ao Goberno central no Pleno da vindeira semana que elabore un estudo serio e minucioso sobre o custo que suporía o rescate e a gratuidade da AP-9 e que suprima todos os impostos que gravan a actividade do tratamento de residuos e recupere a retribución ao investimento da planta termoeléctrica de SOGAMA. A sesión plenaria inclúe, ademais, o debate de totalidade do proxecto de lei de cultura inclusiva e accesible de Galicia e a comparecencia do conselleiro do Mar para dar conta dos proxectos do seu departamento.
Ao remate da Xunta de Portavoces, o portavoz popular, Alberto Pazos, informou que o Pleno dará comezo coa elección de Andrés Lago Louro como novo membro do Consello Consultivo de Galicia, a proposta do Grupo Popular.
LEI PIONEIRA EN EUROPA
De seguido, procederase ao debate do proxecto de Lei de cultura inclusiva e accesible de Galicia, unha norma que nace co obxectivo principal de favorecer a participación na cultura, tanto desde a perspectiva de consumo como da creación, de todas as persoas especialmente as que se atopan nunha situación de desvantaxe ou limitación polo factor que sexa: zona de residencia, déficit de recursos económicos, discapacidade ou dependencia, desemprego, vítima de violencia de xénero, estar en proceso de rehabilitación social ou pertencer a unha minoría étnica.
“Estamos a falar dunha lei pioneira en Europa que vai permitir abrir a cultura á participación de todos os galegos, eliminando as barreiras físicas, cognitivas, comunicativas, sociais ou territoriais”, concretou o portavoz popular, quen apuntou que xurde logo dun amplo proceso de participación cidadá e de reflexión no que tomaron parte máis de 50 entidades do sector, ao que se engadiron as aportacións que realizaron outras organizacións do mundo cultural no proceso de exposición pública da norma”.
A continuación, e continuando coas comparecencias dos conselleiros do Goberno galego para dar conta das liñas xerais e proxectos dos seus departamentos, terá lugar a comparecencia do conselleiro do Mar para informar da situación deste sector da economía galega e das súas perspectivas de futuro, a curto, medio e longo prazo.
Dentro do apartado de proposicións non de lei, o Grupo Popular demandará ao Goberno central a elaboración dun estudio serio e minucioso sobre o custo que suporía o rescate e a gratuidade da AP-9. “Estamos cansos de que o Goberno de Pedro Sánchez tome o pelo aos galegos unha e outra vez, e máis con todo o que atinxe á transferencia desta autoestrada e o custo que suporía este traspaso”, sinalou Alberto Pazos, quen pediu “transparencia e ánimo de chegar a un acordo ao Goberno de España para poñer a disposición dos usuarios da AP-9 unha autoestrada galega e libre de peaxe, algo que vimos demandando todos os grupos políticos deste Parlamento desde hai moito tempo”.
RIGOR E SERIEDADE SOBRE O CUSTO DA GRATUIDADE
O portavoz popular dixo que “fronte á falta de rigor e seriedade do Goberno central, que segundo de onde veña o aire ese día fixa en 1.260, 2.600, 4.000 ou incluso 6.000 millóns de euros a transferencia e gratuidade da AP-9, o Goberno galego foi quen de elaborar un informe, que xa foi remitido ao Goberno de España hai uns días, no que se fixa o custo do rescate e a posterior gratuidade desta autoestrada entre 1.612 millóns de euros e 2.355 millóns”.
Así mesmo, e relacionado coa AP-9, pero que tamén afecta á outra autoestrada de titularidade estatal, a AP-53, o Grupo Popular preguntará ao Goberno galego no vindeiro Pleno sobre a súa valoración respecto do incumprimento dos compromisos do Goberno de España de aplicar, de forma inmediata, os descontos nas autoestradas estatais de Galicia, que seguen colocadas como as máis caras de todo o Estado.
“Lamentablemente, as últimas novas que coñecemos foron as recentes declaracións realizadas polo ministro de Transporte no Senado, onde avanzou que non autorizará de forma inmediata estas rebaixas das peaxes, polo que non haberá bonificacións para a AP-9 nin para a AP-53”, apuntou.
SUPRESIÓN DE IMPOSTOS AO TRATAMENTO DE RESIDUOS
A segunda proposición non de lei que o Grupo Popular levará ao Pleno ten que ver coa decisión do Goberno central de incrementar os impostos ao vertido e á incineración, ao tempo que suprime a retribución á xeración de electricidade por parte das empresas de tratamento de residuos, como é o caso de SOGAMA. Así, Alberto Pazos explicou que “estas decisións están a provocar que SOGAMA se vexa obrigada o vindeiro ano a levar a cabo unha actualización do canon que cobra aos concellos pola xestión dos seus residuos, pasando dos 66 euros por tonelada da actualidade a 108 euros por tonelada”.
O portavoz popular lembrou que o Presidente da Xunta xa amosou no pasado Pleno a plena disposición do Goberno galego de asumir o 60 por cento deste incremento, unha suba que quedaría sen efecto se o Goberno de Pedro Sánchez atendera o que lle pedimos nesta proposición non de lei: que dea marcha atrás e suprima todos os impostos que gravan a actividade do tratamento de residuos e que recupere a retribución ao investimento da planta termoeléctrica de SOGAMA, ao que tiña dereito ata finais de 2026”.
Por último, o Grupo Popular tamén pedirá ao Goberno galego que faga un balance do desenvolvemento do plan de cobertura especial no período estival na sanidade galega; así como que explique as xestións que ten previsto desenvolver a Xunta co obxectivo de acadar o efectivo traspaso dos medios materiais e persoal que permitirían asumir a xestión completa do litoral galego, logo de que o Tribunal Constitucional avalara o contido da lei galega e recoñecera o dereito que ten a xestionar o litoral galego.
