Santiago, 15 de marzo de 2017.- O Grupo Popular apoiou hoxe no Parlamento a aprobación dunha proposición non de lei do Grupo Socialista, “coincidente coas nosas propostas ao demandar a modernización da conexión ferroviaria entre A Coruña e Ferrol, de tal xeito que non só se permita conectar a cidade departamental dun xeito rápido e moderno co eixo atlántico ferroviario e co AVE á Meseta, senón que se converta nun importante elemento estruturador metropolitano, mellorando o transporte de cercanías na rexión urbana A Coruña-Ferrol”, sinalou o portavoz de Infraestruturas, Martín Fernández Prado.
Na súa intervención na Comisión 2ª, Fernández Prado considerou “aconsellable traballar na modernización da conexión ferroviaria entre Ferrol e A Coruña dun xeito que poida ser abordado por fases sucesivas, permitindo mellorar progresivamente os tempos de percorrido entre as dúas cidades”.
O portavoz popular lembrou que o Grupo Popular ten solicitado ao Ministerio de Fomento “unha planificación estratéxica para avanzar neste obxectivo de forma firme e constante, establecendo fases sucesivas para o desenvolvemento das actuacións”.
Neste punto, Martín Fernández indicou que a modernización dos servizos ferroviarios a Ferrol “formou parte da axenda do encontro que o Presidente da Xunta mantivo co ministro de Fomento no mes de xaneiro”, ao tempo que o propio Goberno galego “ten en marcha a contratación dun estudo para a mellora da mobilidade no corredor ferroviario A Coruña-Ferrol co obxectivo de dotarse dunha ferramenta de apoio para demandar melloras nos servizos ferroviarios ante o Goberno central”.
