28 de abril de 2023. O portavoz de Infraestruturas do Grupo Popular, José Manuel Balseiro, salientou hoxe no Parlamento galego que o PSdeG “se sumara finalmente á solicitude ao Goberno de Pedro Sánchez para que cumpra o seu compromiso de garantir o financiamento necesario a través dos fondos Next Generation para a implantación da planta de fibras téxtiles de Altri en Palas de Rei, logo de que no Pleno do pasado 21 de marzo non apoiaran a proposta no mesmo sentido que saíu adiante co apoio dos deputados do PPdeG”.
“Os socialistas galegos conseguiron limpar a súa mala conciencia aceptando hoxe a emenda do Grupo Popular que reiteraba a solicitude ao Goberno central de fondos europeos para o proxecto de Altri, unha panca financeira clave para levantar este complexo de fibras téxtiles en Palas de Rei”, manifestou Balseiro.
Neste sentido, indicou que “a pregunta clave agora é saber se o Goberno de España vai cumprir ou non o seu compromiso de garantir o financiamento necesario para o proxecto de Altri, algo ao que se comprometeu o propio Pedro Sánchez no encontro que celebrou co Presidente Rueda”.
EXEMPLO DE PORTUGAL
José Manuel Balseiro animou ao Goberno de España “a seguir o exemplo do Goberno de Portugal, que xa anunciou 130 millóns de euros de fondos europeos para a fábrica de Altri no seu país”. “Portugal ten demostrado, con feitos, que o proxecto de fibras téxtiles está perfectamente deseñado e con encaixe perfecto nas liñas marcadas en Europa para recibir fondos europeos”, indicou.
Porén, lamentou que “observando a actitude do Goberno de Pedro Sánchez moito nos tememos que a instalación de Altri en Galicia está en risco, xa que se negaron a aprobar un PERTE específico para o sector téxtil, o que obriga á empresa a fraccionar a proposta inicial en 17 miniproxectos para poder captar fondos europeos”.
“Namentres, o Goberno central si concede axudas directas e PERTES a outras comunidades para proxectos como o de vehículo eléctrico en Cataluña, 120 millóns de euros; o de hidróxeno verde en Asturias, 450 millóns de euros; ou o de almacenamento enerxético en Estremadura, 52,9 millóns de euros”, sinalou o portavoz popular.
Balseiro contrapuxo o apoio da Xunta a esta iniciativa empresarial, “con decisións políticas como a adoptada o pasado mes de decembro declarando o proxecto como de interese estratéxico, ao amparo da nova Lei de simplificación administrativa; ao tempo que acompaña a Altri no proceso de deseño do proxecto tanto desde o punto de vista técnico como económico”.
