Santiago, 13 de setembro de 2017.- O Parlamento galego aprobou hoxe, co apoio do Grupo Popular e o voto en contra de En Marea, PSOE e BNG, unha proposición non de lei a través da que se insta á Xunta a introducir o cheque-formación, de xeito que as persoas traballadoras desempregadas dispoñan dun crédito de formación, escollan a formación que queren recibir e a entidade na que queren que se imparta.
A deputada Marta Nóvoa afirmou que esta iniciativa “dotará de liberdade á persoa desempregada, orientándoa cara unha formación máis especializada e adecuada ao mercado laboral actual, para conseguir un emprego de maior calidade e estabilidade”.
Marta Nóvoa lembrou que a Lei 30/2015 regula o sistema de formación profesional para o emprego no eido laboral e establece que os servizos públicos competentes poderán proporcionar un cheque-formación aos traballadores desempregados. Deste xeito, os traballadores desempregados recibirán do seu respectivo servicio público de emprego un cheque-formación que os acredite para realizar, conforme o seu itinerario personalizado de inserción, algunha das accións formativas incluídas no programa formativo da comunidade autónoma.
“Dende o PPdeG consideramos fundamental a renovación do sistema de formación para que sexa axeitado ás necesidades das empresas, así como facer efectivo o dereito dos traballadores á súa formación”, indicou a deputada popular. Neste sentido, apuntou que “o desenvolvemento persoal e profesional é un dereito do traballador, para o que é necesario que dispoña dunha maior e mellor capacidade de adecuarse aos cambios do mercado laboral”.
AUTONOMÍA E LIBERDADE
A través deste cheque-formación, “os traballadores en situación de desemprego terán a autonomía e liberdade para poder elixir a formación e onde cursala”, dixo Marta Nóvoa. Ademais, explicou que este cheque-formación “posibilitará ao traballador participar nunha actividade formativa cun custe preestablecido, sen que en ningún caso supoña unha aportación económica por parte do traballador”.
Para rematar, Nóvoa subliñou que “un requisito destacable é que, previamente á posta en marcha deste cheque-formación, realizarase unha consulta ás organizacións empresariais e sindicais, delimitando os sectores nos que se aplicará e informarase á Conferencia Sectorial de Emprego e Asuntos Laborais”.
