O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se insta á Xunta de Galicia a frear e rexeitar calquera intento de adoutrinamento político das nenas e nenos en idade escolar e a seguir avanzando en ferramentas que garantan a neutralidade ideolóxica nas actividades escolares e complementarias que se desenvolvan nos centros educativos, como base da pluralidade e o respecto ás liberdades individuais.
A deputada popular Carmen Pomar explicou que “desde hai meses estamos a asistir a un intento de asalto por parte de grupos radicais e mesmo do sindicato que está a marcar a folla de ruta do nacionalismo galego para facerse co control dos centros educativos, obxectivo que está tendo un éxito limitado debido, entre outros factores, á boa saúde do noso sistema educativo e á madurez e competencia do profesorado”.
PENSAMENTO CRÍTICO
“O pensamento crítico é unha das habilidades máis valiosas que podemos desenvolver, xa que aprendemos a analizar, reflexionar e tomar decisións de xeito consciente e argumentada”, sinalou Carmen Pomar, quen apuntou que, “nunha sociedade saturada de información, novas falsas e opinións polarizadas, ensinar aos adolescentes a pensar de forma crítica é unha ferramenta esencial para a súa autonomía, a súa autoestima e o seu éxito académico e profesional”. “Pero nin fomentar o pensamento crítico, nin a liberdade de ensino son escusas para que se practique o adoctrinamento, máis ben todo o contrario”, dixo.
En concreto, a deputada popular citou algunhas das accións realizadas nos últimos tempos polo sindicato que manda no independentismo galego para adoutrinar aos estudantes: unha proposta didáctica para traballar co alumnado a situación do medioambiente galego, entrando en xuízos de valor sobre a xestión do lume este verán, a intención de apertura de minas supostamente tóxicas ou a ameaza de industrias como Altri; outra unidade didáctica titulada Guerra e Paz, na que, entre outros exercicios, proponse o cálculo de explosivos e unha suposta estratexia para acabar cos hospitais de Santiago; ou a presentación aos alumnos dunha sexualización de figuras como Rosalía, Blanco Amor, Pondal ou Castelao.
MANIPULACIÓN DOS CONTIDOS
“Estamos preocupados pola deriva que está a tomar esa pretendida manipulación dos contidos que estudan os nosos fillos e fillas, e, o que é máis grave, as actitudes que se van moldeando con premeditación, aleivosía e con fins de proselitismo político, típico de doutrinas políticas da primeira metade do século XX, como o nacional-socialismo ou o comunismo”, indicou.
Por este motivo, Carmen Pomar considerou necesario “seguir denunciando o intento de violar esta estabilidade e a liberdade das familias e instar ao Goberno galego a seguir avanzando nesta dirección”, porque “non estamos aquí para poñer en tela de xuízo a neutralidade do profesorado, estamos para garantirlles a súa liberdade de cátedra e para transmitir unha mensaxe de tranquilidade e amparo ante a ousadía de incorrer nas súas clases”. “Estamos aquí, en definitiva, para asegurar que a administración educativa neutralice calquera intento de propaganda lacerante e descarada, que se destina desde o sector máis radical do nacionalismo a captar, sen escrúpulos, ás idades máis vulnerables que andan á procura da súa identidade e da súa reafirmación”, rematou.
