O Parlamento de Galicia aprobou hoxe a proposición non de lei do Grupo Popular, co voto en contra dos deputados do PSdeG e a abstención do BNG, a través da que se insta ao Concello de Vigo a que permita a instalación da sinalización oficial do Camiño de Santiago ao seu paso pola cidade, coordinándose coa Xunta de Galicia para a instalación de indicadores claros e visibles en puntos estratéxicos.
Así mesmo, demándase ao alcalde vigués que revise a súa postura sobre o Camiño de Santiago, promovendo unha comprensión máis ampla dos beneficios culturais e económicos que este ruta achega a Vigo; ao tempo que se solicita que fomente a colaboración coa Xunta de Galicia e as asociacións de hostaleiros e de peregrinos para desenvolver unha estratexia de promoción do Camiño de Santiago en Vigo.
O deputado popular Miguel Fidalgo cualificou de “anomalía política o bloqueo sistemático do alcalde socialista de Vigo contra o Camiño Portugués da costa e contra todo o que xere progreso se non leva o seu selo persoal”. Neste sentido, indicou que “preocúpano moito a actitude do alcalde vigués cara ao Camiño de Santiago, unha actitude baseada na desconsideración política e que menoscaba o gran potencial estratéxico e simbólico que este roteiro xacobeo representa para Vigo”.
NEGATIVA DESDE 2018
“É lamentable que levemos así desde o ano 2018, cando comezou o proxecto para sinalizar este Camiño de Santiago, nesta negativa a instalar elementos de referencia para os peregrinos na cidade, que se perden constantemente no seu percorrido”, lamentou o deputado popular, quen subliñou que “foi o propio sector da hostalería e do comercio os que tiveron que asumir o papel do Concello e facilitar a instalación da sinalización homologada do Camiño de Santiago na cidade”.
Miguel Fidalgo cifrou en cerca de 90.000 os peregrinos que pasaron polo concello de Vigo ao longo desde ano, dos que máis de 11.000 pernoctaron no albergue do Berbés. “O Camiño Portugués da costa segue a ser o que rexistra un maior incremento de peregrinos nos últimos anos”, destacou.
