O Pleno do Parlamento de Galicia acordou hoxe, a través dunha proposición non de lei do Grupo Popular, dirixirse ao Congreso dos Deputados, en particular á Mesa e a súa Presidenta, co fin de que desbloquee a tramitación da proposición de lei orgánica de transferencia da titularidade e competencias da AP-9 á Comunidade galega, en concreto, acordando, de xeito inmediato, a finalización do prazo para a presentación de emendas para permitir que este texto lexislativo avance cara ao debate de aprobación definitiva. Así mesmo, demándase ao Ministerio de Transportes que avalíe a oportunidade do rescate da autoestrada AP-9, xa que sería máis económico que o mantemento das bonificacións das peaxes ata o fin da concesión.
O portavoz popular de Infraestruturas, Roberto Rodríguez, lembrou que o Parlamento de Galicia aprobou por unanimidade en decembro de 2023 por cuarta vez unha proposición de lei solicitando a transferencia a Galicia da competencia sobre a xestión da AP-9. “A partir dese momento foi medrando a desconfianza sobre a posibilidade de que esta lexítima demanda fora unha realidade a curto prazo, desconfianza que cesou cando no pasado mes de outubro Pedro Sánchez dixo non a transferencia, non á gratuidade e non ao rescate da AP-9, en definitiva, unha vez máis non a Galicia”, indicou.
AS PEAXES MÁIS ALTAS E AS QUE MÁIS SUBEN
“Desde onte van xa 21 prórrogas aprobadas pola Mesa do Congreso ao trámite de emendas á proposición de lei orgánica de transferencia da AP-9, que xunto aos 15 aprazamentos da lexislatura pasada suman 36 labazadas ao acordo unánime aprobado neste Parlamento galego”, explicou o portavoz popular, quen lamentou que “non é que a Galicia se lle estea a negar a transferencia, e que se lle está a negar mesmo o debate”.
Roberto Rodríguez afirmou que a AP-9 ten as peaxes máis altas da súa historia e subliñou que “desde que goberna Pedro Sánchez esta autoestrada é na que máis subiron as peaxes de España, cun incremento acumulado que supera o 28 por cento”.
Ademais, apuntou que o Goberno de Pedro Sánchez ten feitos gratuítos 4 de cada 10 quilómetros de peaxe, o que supón 1.000 quilómetros menos de pago en toda España, “pero ningún na Comunidade galega”.
Respecto do rescate da AP-9, o portavoz popular dixo que “a nova contía anual das bonificacións aprobadas polo Goberno central abre un novo escenario que invita a considerar seriamente o seu rescate”, xa que, “co incremento a 81 millóns de euros anuais das bonificacións das peaxes, o custo da indemnización por rescate, aplicando unha taxa de desconto, e o custo das bonificacións ata o final da concesión aseméllanse de maneira considerable”.
SEN RESPOSTAS AO GOBERNO GALEGO
Roberto Rodríguez asegurou que “ao Goberno galego gustaríalle ter a oportunidade de trasladarlle persoalmente ao Goberno de España a petición de que avalíe a oportunidade deste rescate da autoestrada AP-9, pero despois de oito solicitudes da conselleira de Infraestruturas para ser recibida polo ministro de Transportes o resultado foi cero respostas”.
“Esiximos un trato xusto e equitativo que o Goberno de Pedro Sánchez nos nega, así como rigor e transparencia porque descoñecemos tanto a información que lle foi remitida á Comisión Europea trala apertura dun expediente para analizar a situación da moratoria da concesión, como os termos do estudo realizado polo Goberno de España sobre o custo económico do rescate da concesión da AP-9”, manifestou o portavoz popular, quen apuntou que “o que si coñecemos son os pronunciamentos do Consello Consultivo de Galicia e da Comisión Galega de Competencia que alertan do carácter abusivo dos acordos entre o Estado e a concesionaria”.
