Santiago, 23 de outubro de 2018.- O Parlamento de Galicia aprobou hoxe por unanimidade a proposición non de lei do Grupo Popular, que foi transaccionada dos grupos do PSOE e En Marea, a través da que se demanda á empresa Alcoa que reconsidere a súa decisión e retire o expediente de extinción de emprego sobre a totalidade da plantilla da súa factoría de A Coruña, tentando buscar solucións entre todos os axentes políticos, económicos e sociais afectados, abrindo unha mesa de negociación con todas as partes.

 

Así mesmo, a proposta require ao Goberno central que poña en marcha, antes de que finalice a anualidade orzamentaria 2018, as compensacións por importe de 150 millóns de euros polos custos adicionais incorridos polas industrias electrointensivas.

 

 

Ademais de demandar a Alcoa a súa reconsideración e retirada do expediente de extinción de emprego sobre a totalidade da plantilla na súa factoría de A Coruña, a proposición non de lei pon de manifesto que as solucións que se adopten entre todos os sectores afectados deberán incorporar liñas de actuación adecuadas e de futuro que garantan o mantemento da produción e o emprego en factoría de A Coruña.

 

 

A portavoz de Enerxía, Marta Nóvoa, expresou “a solidariedade do Grupo Popular cos traballadores de Alcoa” e asegurou que “o mantemento dos empregos é no que debemos concentrar agora todos os nosos esforzos”. “A decisión unilateral de Alcoa de querer pechar as plantas de A Coruña e Avilés non a compartimos nin entendemos”, dixo.

 

 

Deste xeito, demandou “unidade de acción para que a empresa rectifique e levante o expediente de regulación de emprego, ao tempo que o Goberno central poña sobre a mesa un marco eléctrico que achegue estabilidade e certeza ás empresas electrointensivas”. “Non haberá futuro para Alcoa sen un marco regulatorio enerxético claro e definido”, concretou.

 

 

 

A proposición non de lei aprobada esta tarde tamén demanda ao Goberno central a posta en marcha das compensacións previstas na disposición adicional centésima cuadraxésima quinta da Lei 6/2018, do 3 de xullo, de Orzamentos Xerais do Estado para o ano 2018, por importe de 150 millóns de euros, ao tempo que para o exercicio 2019 e seguintes se implante un novo réxime de compensación por custos adicionais incluídos no prezo da electricidade soportados pola industrias electro-intensivas.

 

 

Así mesmo, e de cara a anos sucesivos, se solicita que o Goberno central estableza todos os mecanismos de compensación necesarios, previo acordo coas Comunidades Autónomas afectadas, para que este tipo de industrias compitan en igualdade de condicións coas súas homólogas europeas.