Santiago, 24 de febreiro de 2017.- O Parlamento de Galicia aprobou hoxe a proposición non de lei, impulsada polo Grupo Popular, a través da que se insta á Xunta a poñer en marcha accións orientadas a amosar as vantaxes de falar galego e apoiar os neofalantes que están pensando ou xa teñen decidido adoptar o galego como lingua de comunicación. “Estas accións tamén deberán axudar a combater os posibles estereotipos e prexuízos que poidan existir arredor da intencionalidade ou competencia lingüística de quen comeza a utilizar o idioma propio de Galicia, sen ser esta a súa lingua inicial”, manifestou o portavoz de Cultura, César Fernández.
Os neofalantes son aquelas persoas que tiveron o castelán, ou outro idioma como lingua materna, mantiveron esta lingua como idioma de socialización familiar, pero que logo aprenderon o galego en novos espazos vitais e que, a partir dese momento, falan a lingua galega.
César Fernández explicou que o obxectivo é que o Goberno galego “elabore un proxecto unitario que xere unha dinámica de participación e colaboración no seu deseño e execución coas entidades máis representativas do ámbito lingüístico e dos sectores que representan as políticas de xuventude para manter no tempo a continuidade das accións que se promovan”.
OBXECTIVOS
Entre os obxectivos a acadar, o portavoz popular sinalou a promoción dunha estratexia de acción dirixida, sobre todo, á xente nova “para favorecer a utilización da lingua galega nas súas relacións interpersonais e naqueles ámbitos nos que se desenvolve a súa vida cotiá”. Ademais, avogou por “buscar a implicación dos diferentes sectores da sociedade para promover accións tendentes a recuperar o galego como lingua habitual de uso cotiá en calquera faceta da vida”.
Ademais, César Fernández subliñou a necesidade de “fomentar o neofalantismo e a implicación directa dos colectivos sociais, as asociacións xuvenís, de deportes, da cultura, do patrimonio, os centros de educación, as empresas e, en xeral, de todas aquelas persoas que decidiron libremente utilizar a lingua galega para comunicarse e desenvolver a súa vida en lingua galega”.
“Tamén é necesario establecer medidas que visibilicen os casos de neofalantes máis destacados, para construír un discurso de prestixio social e internacional do galego”, manifestou o portavoz popular, quen engadiu que “esta é unha práctica que na realidade sociolingüística de Galicia, axuda ao éxito deste tipo de medidas incrementando o prestixio social da lingua”.
