O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se demanda tanto á Xunta como ao Goberno central a posta en marcha de medidas de loita contra a violencia machista e de protección das mulleres vítimas de violencia de xénero, tanto de impulso dos servizos que se lles prestan desde as administracións, como na mellora dos sistemas de protección ou a reprobación de calquera manifestación que vulnere o principio de Igualdade de trato entre mulleres e homes. Así mesmo, esíxese a dimisión da ministra de Igualdade polos fallos acontecidos coas pulseiras de control telemático antimaltrato empregadas para a protección das vítimas de violencia contra as mulleres.
A viceportavoz do Grupo Popular, Paula Prado, lamentou que “cada día coñecemos novos casos de agresións sexuais, violacións ou trata de mulleres, e seguimos gardando minutos de silencio e chorando polos asasinatos de mulleres a mans das súas parellas ou exparellas, mesmo daquelas que estaban baixo a protección do sistema Viogen”.
SEGURIDADE, PROTECCIÓN E DIGNIDADE
“A isto sumáronse os erros gravísimos no sistema de control das pulseiras antimaltrato, que deixaron as mulleres máis vulnerables completamente desprotexidas”, lamentou Paula Prado, quen solicitou que estes erros “non poden repetirse nunca máis e para iso só hai un camiño: a dimisión da ministra de Igualdade, como responsable deste erro continuado no tempo e que non pode seguir neste cargo nin un minuto máis desprezando ás vítimas”.
Na súa intervención, manifestou que “hoxe estamos aquí para devolverlle ás mulleres o que outros lle retiraron: seguridade, protección e dignidade”, porque “a violencia de xénero non admite erros lexislativos, non admite improvisación e non admite atallos ideolóxicos”. “Nós non xogamos cos dereitos das vítimas, non banalizamos a súa protección e non convertemos o feminismo nunha batalla cultural nin nunha trincheira partidista”, asegurou.
Respecto das medidas solicitadas a través da proposición non de lei, Paula Prado concretou que “pedimos que se reforcen en Galicia todos os recursos a dispor das vítimas, como axudas económicas, habitacionais, de inserción laboral, atención psicolóxica ou asistencia xurídica gratuíta; así como modernizar os centros de información ás mulleres, como peza fundamental na atención ás vítimas, e ampliar a rede de entidades locais e impulsar as mesas de coordinación”.
“Pero tamén demandamos ao Goberno de España que non mire cara outro lado, porque o sistema Viogen fallou, o sistema Cometa fallou e o Ministerio sabía dos erros das pulseiras e non actuou a tempo”, indicou. Deste xeito, manifestou que “hai responsabilidades do Goberno central que hoxe están sen cumprir e, por iso, instamos a que fortaleza o sistema Viogen para garantir a súa eficacia real; asuma responsabilidades políticas polo fallo gravísimo e continuado nas pulseiras antimaltrato; realice unha auditoría independente para saber que pasou e evitar que volva a pasar; garanta dispositivos telemáticos realmente seguros, especialmente nas contornas rurais; cumpra coas medidas pendentes do Pacto de Estado contra a violencia de xénero; palíe a revitimización derivada da Lei do si e si, que puxo na rúa a máis de 1.500 agresores sexuais; e dote ás comunidades autónomas dos recursos necesarios para prevención e detección”.
Para rematar, Paula Prado sinalou que “a violencia de xénero non só se expresa nas agresións físicas ou sexuais, senón tamén no insulto, no desprezo e no ataque público ás mulleres que ocupan espazos de responsabilidade”. “Por este motivo, tamén pedimos a reprobación de calquera manifestación que denigre a dignidade das mulleres e dos ataques machistas contra representantes públicas, porque quen agrede, quen insulta ou quen denigra a unha muller polo feito de selo está alimentando a mesma cultura que logo xustifica ou tolera a violencia máis extrema”, indicou.
