Santiago, 14 de setembro de 2017.- O Parlamento de Galicia aprobou esta mañá unha proposición non de lei, impulsada polo Grupo Popular, a través da que se insta á Xunta de Galicia a promover, en colaboración con distintas institucións e entidades culturais, unha programación ampla e diversa de iniciativas que poña de relevo a excepcional importancia do pergamiño Vindel para as culturas galega e universal, e que faga partícipe da presenza desta obra en Vigo ao conxunto da cidadanía.
Neste sentido, a deputada Teresa Egerique criticou que o Concello de Vigo “estea a darlle as costas a esta xoia da nosa historia, desentendéndose e rexeitando colaborar na exposición organizada con motivo de volta do pergamiño Vindel”.
A deputada Teresa Egerique explicou que o pergamiño Vindel “é o máximo expoñente ou testemuña que podemos ter fisicamente de Martín Códax, unha xoia da lírica medieval galaico-portuguesa e un dos máximos expoñentes da cultura peninsular”.
Este pergamiño atópase depositado desde hai décadas na Morgan Library de Nova Iorque e exhibirase no Museo do Mar de Galicia en Vigo desde o próximo mes de outubro ata marzo de 2018.
“O valor deste tesouro bibliográfico e musical outórgalle a este acontecemento unha importancia excepcional que atraerá, de seguro, numeroso público interesado, tanto de dentro como de fóra da península ibérica, e que contribuirá a situar a cultura galega nun lugar destacado durante os próximos meses”, avanzou Egerique.
Así mesmo, explicou que a exposición estará comisariada por Francisco Singul e o pergamiño Vindel estará acompañado por obras procedentes doutros museos galegos, co obxectivo de contextualizar unha época de grande riqueza cultural e na que Galicia xa figuraba na vangarda europea.
FALTA DE COMPROMISO DO CONCELLO
Teresa Egerique manifestou que a Xunta de Galicia asume os gastos derivados da exposición do pergamiño, mentres que a Universidade de Vigo faise cargo dos gastos derivados da loxística.
Neste sentido, lamentou a “a total falta de compromiso do Concello de Vigo con esta importante exposición, que converterá a esta cidade na capital da cultura galega ao acoller un pergamiño dun valor incalculable que leva o nome de Vigo por todo o mundo desde hai séculos”.
