Santiago, 30 de xuño de 2021.- O Parlamento de Galicia aprobou hoxe a proposición non de lei do Grupo Popular a través da que se solicita que a Xunta realice unha análise da valoración dos prezos de referencia dos parques eólicos instalados en Galicia para favorecer a transparencia nas negociacións entre os promotores e os propietarios afectados polo desenvolvemento de nova potencia renovable en Galicia.

?O marco regulatorio é moi garantista e cremos que é necesario seguir avanzando na confianza e a transparencia para axudar aos propietarios dos terreos sobre os prezos de referencia, para as negociacións coas empresas na instalación de parques eólicos @MartaNovoaMarta pic.twitter.com/EjCay1aFFq

— GrupoPopularGalicia (@GrupoPopularGal) June 30, 2021

A portavoz de Enerxía do Grupo Popular, Marta Nóvoa, lembrou que “os acordos entre propietarios e promotores nos parques postos en marcha en 2019 en Galicia alcanzou o 85 por cento”. Porén, e tendo presente esta situación “consideramos conveniente crear un marco de referencia de prezos dos terreos, que axude aos propietarios e que lles sirva como guía nas negociacións coas empresas”.

REDE DE INFORMACIÓN EXHAUSTIVA

Nóvoa sinalou que, para mellorar a transparencia, a Xunta “creou unha rede de información exhaustiva, de xeito que os concellos e os veciños coñecen de antemán cales son as iniciativas que se pretenden tramitar en Galicia, mantendo en todo momento todas as garantías a favor da participación pública das persoas físicas e xurídicas interesadas na avaliación dos proxectos eólicos, así como de todos os órganos afectados”.

Así mesmo, reiterou que “o marco regulatorio vixente é extraordinariamente garantista, polo que ningún proxecto pode saír adiante sen os informes preceptivos favorables”. A portavoz popular apuntou que, gracias á Lei de reactivación, “xa foron informados negativamente 36 proxectos eólicos, de case 27.000 Mw de potencia total, que tramitaba o Goberno central en Galicia por pasar dos 50 Mw de potencia”. “Galicia está blindada nun 77,5 por cento do seu territorio da instalación de parques eólicos, e así queremos que se continúe”, asegurou.

INFRAVALORAR UN SECTOR CLAVE

Marta Nóvoa considerou “un grave erro tratar de infravalorar un sector clave como o eólico, como están a facer desde o BNG ou o PSdeG, no que Galicia ten o gran recurso principal: o vento”, ao que engadiu como “un erro maior tratar de amedrentar e contribuír á crispación na sociedade galega”.

“Sobre todo cando despois de poñerse de acordo para pechar as térmicas galegas de Meirama e As Pontes, sen nin sequera abordar a solución innovadora do biocombustible, tamén se opoñen á enerxía renovable e á posta en marcha de novos proxectos como a enerxía eólica mariña”, manifestou.