Santiago, 21 de outubro de 2021.- O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se insta á Xunta a que, tomando como base os informes de xuristas, remita un informe xurídico ao Goberno de España para esixir que se efectúe a necesaria reforma lexislativa que axude a poñer freo ao fenómeno da ocupación de vivendas.
A deputada popular Marisol Díaz Mouteira manifestou que “as novas sobre ocupación ilegal de vivendas son cada vez máis frecuentes e, nos últimos meses, os cidadáns observan como se incrementan os problemas derivados das mesmas”. Diante desta situación, afirmou que “preocúpanos a actitude do Goberno central, pois, no canto de traballar na resolución deste problema, aproba o Real Decreto-Lei 37/2020 que suspende os procedementos xudiciais para o lanzamento das ocupacións ilegais durante o estado de alarma, cando debería poñer en marcha medidas que desalenten este tipo de comportamentos”.
“Non estamos ante un problema cuantitativo, senón cualitativo, xa que cada ocupación afecta negativamente a moitas familias e cidadáns que ven perturbada a súa vida cotiá”, sinalou a deputada popular. En concreto, asegurou que en Galicia “non son grandes corporacións ou grandes tenedores os principais afectados, senón cidadáns que, en moitos casos, teñen no alugueiro da vivenda un complemento para os seus ingresos ou para as súas pensións”.
Ademais, Marisol Díaz dixo que as ocupacións “xeran con frecuencia problemas de convivencia entre residentes habituais da zona e os novos inquilinos”.
SEGURIDADE XURÍDICA AOS PROPIETARIOS
Deste xeito, apuntou que, “se non ofrecemos seguridade xurídica aos propietarios de vivendas fronte ás ocupacións ilegais e aos pagos inxustificados dos alugueiros, non imos conseguir facerlle fronte ao problema da ocupación nin incrementar a oferta de vivenda en alugueiro, cos conseguintes problemas para as familias galegas”.
“O Goberno do Estado é a administración competente para impulsar reformas lexislativas que freen a práctica delituosa da ocupación de vivenda”, asegurou a deputada popular, quen lembrou que desde o PPdeG “avogamos por un endurecemento das penas aos que ocupan unha vivenda, ao tempo que se axilicen os procedementos que permitan devolver as vivendas ocupadas aos seus propietarios”.
Díaz Mouteira sinalou que esta reforma lexislativa “é a solución duradeira e eficaz non só para rematar cos casos de ocupación, senón tamén coa sensación de impunidade que se xera ao redor deste fenómeno”.
