22 de novembro de 2022. O Pleno do Parlamento de Galicia aprobou hoxe, sen o apoio do BNG, a lei pola que se ratifica a retribución de carácter extraordinario para os empregados do sector público de Galicia para facer fronte á suba da inflación. O portavoz do Grupo Popular, Pedro Puy, considerou “unha medida xusta que a Xunta aplicará con esforzo”, xa que será o Goberno galego quen faga fronte aos 78,4 millóns de euros que supón a aplicación desta suba.
Pedro Puy explicou que esta nova lei é derivada da transposición dun decreto-lei aprobado polo Goberno central, ante o que sinalou que “o decreto é un instrumento áxil para situacións de emerxencia, pero iso non debe supoñer que se converta en ordinario o que debería ser extraordinario”. Neste sentido, salientou que “o Goberno de Pedro Sánchez leva aprobados 132 decretos-lei, o que supón un cada doce días e un récord sobre os demais gobernos de España para quen denunciaba o abuso do decreto lei por parte do Goberno de Mariano Rajoy”.
O portavoz popular salientou “a axilidade” do Goberno galego á hora de traer este decreto-lei ao Parlamento galego, demostrando unha vez máis a súa “lealdade institucional e poñendo de manifesto a súa decidida política para mellorar as condicións de traballo dos empregados públicos”. Ademais, dixo que se tramitará dunha forma “áxil, de xeito que os pagos se fagan xa este mesmo ano”.
Porén, Puy manifestou que “o Goberno de Pedro Sánchez impón a obriga de pagar aos funcionarios galegos eses 78,4 millóns de euros, pero é a Xunta a que ten que facer fronte a este pago”. “Non se consultou coas comunidades autónomas, que asumen teñen que afrontar este incremento retributivo sen ningún tipo de financiamento estatal”, lamentou.
