Santiago, 16 de febreiro de 2021.- O Parlamento galego aprobou hoxe unha proposición non de lei, logo dunha transacción entre o Grupo Popular e o BNG, a través da que se insta á Xunta a tomar as medidas necesarias para que a empresa concesionaria do encoro de Portodemouros, situado no curso do Ulla medio entre os concellos de Santiso, Arzúa e Vila de Cruces, cumpra coas súas obrigas a respecto das condicións que debe observar a barcaza e as instalacións que comunican as parroquias de Loño (Vila de Cruces) e Beigondo (Santiso), segundo o establecido nas condicións da concesión do encoro á empresa Naturgy.
O deputado popular Rubén Lorenzo explicou que a Xunta, a través de Augas de Galicia, “é a responsable, e así o está a facer, de vixiar o cumprimento pola empresa Naturgy Generation, SLU das condicións establecidas nas distintas autorizacións ditadas e no dereito concesional que rexen o funcionamento da barcaza” que atravesa o embalse de Portodemuros desde a parroquia de Beigondo no concello de Santiago ata a parroquia de Loño en Vila de Cruces.
AMPLIACIÓN DA BARCAZA E DOS ACCESOS
Deste xeito, o Goberno galego insta á empresa ao cumprimento destas condicións e requirirlle para que adopte as medidas que sexan necesarias, “pero non pode ir mais aló impoñendo esixencias ou responsabilidades que non estean establecidas, coa conseguinte vulneración do principio de seguridade xurídica”, apuntou.
Neste sentido, Rubén Lorenzo lembrou que “desde a Xunta tense instado á empresa para a ampliación e reforma da barcaza, co obxecto de dar cumprimento ás condicións establecidas; así como a ampliación e adecuación dos camiños de acceso, estando ambas obras realizadas neste momento á falta dalgúns remates e a mellora da iluminación”.
“A Xunta realiza e continuará realizando este seguimento e esixindo a adopción das medidas que se requiran para o bo funcionamento desta instalación”, subliñou o deputado popular.
