Santiago, 17 de novembro de 2020.- O Parlamento de Galicia aprobou hoxe a proposición non de lei do Grupo Popular, que non contou co apoio nin de BNG nin de PSdeG, a través da que se demanda ao Estado a cesión da xestión do Pazo de Meirás á Xunta de Galicia, co obxectivo de desenvolver usos culturais que expliquen a historia do inmoble, reivindiquen o entendemento e a concordia, e afonden no papel das escritoras na historia da literatura, particularmente de Emilia Pardo Bazán.

O deputado popular Alberto Pazos salientou, en primeiro lugar, que a incorporación do Pazo de Meirás ao patrimonio público “é un triunfo de todos os galegos, caracterizado polo consenso e a defensa dos intereses comúns”.

O MÁIS LÓXICO: QUE SEXA DE GALICIA

Na súa intervención, considerou “o máis lóxico na actualidade é que sexa Galicia quen xestione este ben, porque foi na nosa Comunidade onde se iniciou o proceso para a recuperación de Meirás e, polo tanto, debe rematar aquí, coa súa devolución ao patrimonio público dos galegos”.

Alberto Pazos lembrou que a Xunta xa solicitou ao Goberno central a xestión do Pazo de Meirás, que será devolto ao Estado por parte da familia Franco o vindeiro 10 de decembro. Neste sentido, lamentou que “tanto nacionalistas como socialistas non apoiaran esta proposta para que sexa Galicia a que xestione este ben e dedicar este espazo a fins culturais acordes coa súa historia e ao seu valor emblemático como patrimonio cultural galego”.

En concreto, o deputado popular explicou que os usos do Pazo de Meirás terán tres piares básicos: explicar a historia do inmoble, reivindicar o entendemento e a concordia, e afondar no papel das escritoras na historia da literatura, particularmente de Emilia Pardo Bazán.

ESPÍRITO ORIXINAL DE PARDO BAZÁN

“As paredes do Pazo de Meirás viron as longas xornadas de traballo de Emilia Pardo Bazán, unha das máis destacadas escritoras da nosa historia literaria e considerada como a mellor novelista española do século XIX”, salientou Pazos. Deste xeito, apuntou que “a proposta da Xunta é clara para devolverlle a este edificio o seu espírito orixinal de Pardo Bazán: o da galega comprometida coa cultura; o da escritora excepcional, que fixo do pazo escenario creativo de moitos dos seus escritos; e o da muller que loitou pola igualdade entre homes e mulleres”.

Para conseguir este obxectivo, Alberto Pazos recordou que a Xunta “está a dar novos pasos cara adiante, co inicio, de xeito urxente, da declaración de ben de interese cultural da biblioteca de Emilia Pardo Bazán para blindar a súa protección e dar resposta á petición realizada pola Real Academia Galega”.

Coa decisión da Xunta non só se está a incluír os arredor de 3.000 volumes situados en Meirás, senón tamén os 7.000 fondos que a Real Academia Galega custodia na biblioteca e no arquivo da súa sede e que son un referente mundial para os estudos sobre a escritora.