10 de novembro de 2022. O Parlamento de Galicia aprobou hoxe a proposición non de lei do Grupo Popular a través da que se insta á Xunta a reformar o Decreto 105/2017, polo que se regula o sistema de garantía de tempos máximos de acceso ás prestacións sanitarias públicas, co obxecto de incrementar o número de patoloxías cubertas por esta norma. “Máis de 217.000 persoas se beneficiaron nestes anos da aplicación deste decreto e só unha rematou sendo derivada á sanidade privada”, concretou a portavoz popular de Sanidade, Encarna Amigo.
A través do decreto 105/2017, a Xunta fixou un prazo máximo de espera de 60 días naturais para as intervencións cirúrxicas programadas e non urxentes, cancros e outras patoloxías graves; un prazo máximo de espera de 45 días naturais para as primeiras consultas externas hospitalarias programadas e non urxentes de vías rápidas de cancro; e un prazo máximo de espera de 45 días naturais para as primeiras probas diagnósticas ou terapéuticas programadas e non urxentes garantidas relacionadas coa vía rápida de cancro.
COMPROMISO INDIVIDUAL POR PATOLOXÍA
“Con este decreto, desde a Xunta adquiriuse un novo compromiso cos pacientes, xa que se pasou dunha xestión global de tempos de espera por prioridades, para todas as doenzas, a un compromiso individual por patoloxía”, dixo a portavoz popular. Así, o decreto selecciona patoloxías oncolóxicas malignas, valvulopatías, patoloxías vasculares arteriais, patoloxías cerebrais benignas, neoplasias, carcinomas e patoloxías oftalmolóxicas.
Ademais, cando desde o Sergas non se lle poida ofrecer ao cidadán a atención no tempo máximo establecido, este poderá optar por continuar na lista de espera no centro que lle corresponda ou requirir a atención garantida noutro centro acreditado da Comunidade galega, ben nun centro público doutra área sanitaria ou nun centro concertado. Neste casos, o Sergas asumirá directamente o pagamento dos gastos da intervención, unha situación que só se deu nunha ocasión desde a entrada en vigor deste decreto.
Encarna Amigo manifestou que, “pasados xa máis de catro anos desde a entrada en vigor desde decreto e descartados os efectos nocivos prognosticados pola oposición e nunca producidos, consideramos oportuno seguir avanzando na extensión deste sistema a máis patoloxías”.
