Santiago, 9 de outubro de 2020.- O Parlamento de Galicia aprobou hoxe a proposición non de lei do Grupo Popular a través da que se insta á Xunta a reforzar o selo Galicia Calidade para que funcione como marca paraugas de todos os produtos que reflexan a excelencia do sector primario galego. O deputado popular Daniel Vega afirmou que Galicia Calidade “non pode ser un club exclusivo, senón unha marca para todos aqueles que decidan unirse á filosofía da calidade, por enriba da cantidade”.
Daniel Vega avogou porque a marca Galicia Calidade “sexa un motor do rural galego, que existe e avanza e que sexa sinónimo de emprego”. Deste xeito, apuntou o seu convencemento de que esta marca “non se apoia con palabras, senón con financiamento e estratexia”: financiamento para promocionar, situar e axudar a todos os produtores e transformadores do sector agroalimentario, e estratexia para optimizar recursos e unificar a acción de todos os actores implicados.
APOSTA POLO VALOR ENGADIDO
“Galicia Calidade ten que ser unha aposta polo valor engadido, porque non queremos cantidade a calquera prezo, senón produción con calidade diferenciada”, manifestou o deputado popular.
Así mesmo, Vega sinalou que esta marca “tamén servirá para identificar e potenciar os produtos galegos con denominación de orixe, indicación xeográfica protexida ou que cumpran requisitos de excelencia en produción ou transformación. “Galicia Calidade amparará tamén os produtos derivados das razas gandeiras autóctonas galegas, dándolle así un valor engadido a estas producións, así como ao selo Galega 100%”, apuntou.
