Santiago, 6 de outubro de 2022.- O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que habilite un rexistro centralizado onde poder obter o certificado de titularidade das contas, saldos e posicións bancarias dunha persoa falecida, coas cautelas que esixa a lexislación vixente, en especial en materia de protección de datos. “O obxectivo é facilitar aos herdeiros o acceso á información para cumprir as obrigas legais e tributarias con certeza, claridade e seguridade», sinalou a deputada popular Felisa Rodríguez.
A deputada popular manifestou que, “se ben nos últimos anos déronse importantes pasos na realización de xestións burocráticas por parte dos herdeiros dunha persoa falecida, coa posibilidade de obter dun xeito centralizado certificados como os de falecemento, últimas vontades ou o rexistro de seguros de cobertura, a día de hoxe resulta moi complicado coñecer con exactitude todas as posicións bancarias das que era titular a persoa falecida e que, pola razón que fora, poden ser descoñecidas polos herdeiros”.
INFORMACIÓN COMPLEMENTARIA
“Por este motivo, consideramos necesario habilitar un procedemento sinxelo para que aquela persoa que acredite interese lexítimo poida obter un certificado no que se indique o nome das entidades financeiras onde o falecido posúe contas, valores ou préstamos”, sinalou Felisa Rodríguez. Así mesmo, dixo que este rexistro “debería estar incluído no Ministerio de Xustiza e complementaría os rexistros do certificado de defunción, as últimas vontades e os contratos de cobertura de seguros de falecemento”.
Ademais, indicou que esta información “debería abarcar ata un período de un ano antes da data de falecemento, tal e como establece a normativa vixente do imposto de sucesións”, ao tempo que alertou de que, “por imperativo legal, os saldos destas posicións bancarias, transcorridos 20 anos sen movementos nas mesmas, pasarán a ser propiedade do Estado, en vez de pasar aos herdeiros lexítimos”.
