Santiago, 23 de xuño de 2021.- O Parlamento de Galicia aprobou hoxe a proposición non de lei do Grupo Popular, sen o apoio do Grupo Socialista, a través da que se solicita ao Goberno central que desista de tramitar a autorización dos proxectos eólicos da súa competencia que supoñan a implantación fóra das áreas definidas polo Plan Sectorial Eólico de Galicia.

?️A proposta do @ppdegalicia defendida hoxe por @MartaNovoaMarta no @Par_Gal busca a ordenación na instalación de parques eólicos con todas as garantías xurídicas,técnicas e medioambientais, a @Xunta xa informou negativamente 36 proxectos estatais por incumprir a normativa pic.twitter.com/zI17wE9r32

— GrupoPopularGalicia (@GrupoPopularGal) June 23, 2021

Así mesmo, solicítase que a información ambiental publicada polo Ministerio de Transición Ecolóxica, no ámbito de zonificación ambiental para as enerxías eólicas e fotovoltaica, “sexa clara e non induza a error, porque nestas zonas nas que está incluída a Rede Natura infórmase aos promotores que os proxectos eólicos non están recomendados, cando por lei están expresamente prohibidos”, sinalou a portavoz do Grupo Popular en Enerxía, Marta Nóvoa.

“A Xunta ten que seguir ofrecendo a súa máxima colaboración para que se aproveiten as oportunidades que xurdan no sector eólico, sempre e cando os proxectos que se presenten cumpran coas directrices fixadas tanto no eido medioambiental, como sectorial ou técnico, exercendo a máxima transparencia á cidadanía e velando sempre pola compatibilidade con outros sectores económicos”, manifestou Marta Nóvoa.

Na súa intervención, lembrou que Galicia conta cun plan sectorial eólico que define as áreas de desenvolvemento onde se poden colocar aeroxeradores, así como coa Lei de simplificación administrativa e de apoio á reactivación, que reforzou a prohibición de implantar parques eólicos fóra destas áreas. A única excepción son aqueles proxectos que teñan unha clara incidencia territorial pola súa entidade económica e social, e posúan unha función vertebradora no territorio.

INFORMACIÓN NEGATIVA A 36 PARQUES

“Gracias a este instrumento, a Xunta xa informou negativamente 36 proxectos, de case 2.700 Mw de potencia total e uns cantos centos de muíños, que intentaba tramitar o Goberno central en Galicia por pasar de 50 Mw de potencia”, apuntou.

Neste sentido, indicou que “Galicia está blindada nun 77,5 por cento da instalación de parques eólicos, e así queremos que continúe porque o noso modelo é a instalación ordenada de proxectos con todas as garantías xurídicas, técnicas e medioambientais, facendo compatible o uso industrial co uso agrogandeiro, como se leva facendo ata o de agora”.

Para rematar, a portavoz popular incidiu que “estamos ante unha enerxía limpa e sostible, con tres décadas de historia e convivencia pacífica na Comunidade galega”, onde xera máis de 7.000 postos de traballo e contribúe con 580 millóns de euros ao PIB galego. Así, subliñou que Galicia conseguiu ser o pasado ano a segunda comunidade en xeración de enerxía renovable, producindo o 75,6 por cento da enerxía con fontes renovables, achegando case un 40 por cento o sector eólico.