Santiago, 7 de abril de 2022.- O Parlamento de Galicia aprobou hoxe a proposición non de lei do Grupo Popular a través da que se solicita ao Goberno de España que promova accións dirixidas a frear a proposta da Comisión Europea para a modificación da Directiva sobre Fiscalidade da Enerxía que elimina as axudas aos combustibles do sector pesqueiro namentres non haxa unha posición aprobada no seo da Organización Mundial de Comercio (OMC) ao respecto destas bonificacións.
Así mesmo, o Grupo Popular aceptou incorporar á proposición non de lei a emenda do BNG a través da que se solicita á Xunta a elaboración, en colaboración co sector, de estudos e informes sobre o impacto social, económico e laboral que tería a modificación da Directiva de Tributación da Enerxía no sector pesqueiro galego e no conxunto da economía galega, así como impulsar todas as accións que se consideren tendentes a reverter a proposta do Comisión Europea e os seus efectos na frota galega, nomeadamente facendo valer o carácter de país altamente dependente da pesca diante da Unión Europea.
A portavoz popular do Mar, Teresa Egerique, sinalou que “os últimos bandazos e cambios de opinión do Goberno de Pedro Sánchez, sen unha postura firme, obrígannos a insistir na defensa do mantemento do statu quo para evitar unha situación que deixaría en desvantaxe á frota galega e española”. “Esiximos que non haxa máis bandazos e que se manteña esta defensa a prol da frota, ao tempo que demandamos a todas as forzas que se unan a esta postura dunha forma clara”, engadiu.
PESCA RESPONSABLE E SUSTENTABLE
“Galicia rexeita a eliminación xeneralizada do combustible bonificado para a frota pesqueira que propón o borrador da OMC, xa que pon en risco a sustentabilidade e o futuro do sector pesqueiro galego”, asegurou Teresa Egerique, quen considerou que “se trata dunha medida inxusta, xa que cargaría de novo un esforzo sobre a frota da Unión Europea e da galega, que están demostrando practicar unha pesca responsable e sustentable en todos os mares nos que desenvolve a súa actividade sobre un equilibrio nos termos ambientais, sociais e económicos”.
Egerique concretou, ademais, que esta proposta “sería especialmente gravosa para a frota artesanal, xa que é a única que non podería subministrarse combustible en puntos onde estivese bonificado ou carente de impostos”.
“Non entendemos o cambio de opinión da Comisión Europea, que antes concordaba coa de Galicia, nin que o Goberno central se pregue a esa posición e faga seguidismo dunha posición negativa para a frota galega, como tampouco concordamos coa cor verde radical que amosan algunhas formacións en Europa, nin co silencio cómplice dos seus socios en Galicia”, manifestou.
