Santiago, 10 de xullo de 2018.- O Grupo Popular apoiou hoxe no Parlamento de Galicia a aprobación da proposición de lei, para remitir ao Congreso, para a transferencia da titularidade e competencias da AP-9 á Xunta. “Imos seguir mantendo a mesma postura: por un lado, demandando un mellor servizo nesta autoestrada e, por suposto, a petición de traspaso da súa titularidade”, asegurou o portavoz de Infraestruturas, Martín Fernández Prado.
Na súa intervención, Fernández Prado asegurou que “o mellor xeito de velar pola calidade do servizo é que a AP-9 sexa de titularidade autonómica, porque deste xeito poderíamos analizar a planificar as peaxes e as obras na autoestrada conforme a criterios propios”.
NON IMOS ENGANAR Á CIDADANÍA
“Pero non imos enganar á cidadanía como pretende facer a oposición, porque o traspaso das competencias e da xestión da AP-9 á Xunta non supón a eliminación total das peaxes”, concretou. Neste sentido, explicou que a liberalización da peaxe na AP-9 “require destinar inxentes cantidades de recursos públicos a unha empresa privada, entre outros motivos porque o Goberno socialista deixou blindado un negocio redondo para Audasa a conta das obras de ampliación da autoestrada en Santiago e Vigo”.
Martín Fernández avogou porque o actual Goberno socialista “non continúe coa liña dos anteriores gobernos socialistas coa AP-9, permitindo que as peaxes da autoestrada poidan subir un 1 por cento acumulativo anual durante 20 anos para pagar unhas obras na autoestrada a un interese fixo do 8 por cento, a día de hoxe impensable”.
UNANIMIDADE FUNDAMENTAL
O portavoz popular lembrou que o Parlamento galego xa aprobou dúas proposicións de lei en relación coa transferencia da AP-9, pero “agora a sentenza do Tribunal Constitucional ofrece máis posibilidades de defender o que desde a Xunta e o Grupo Popular vimos reclamando desde hai moito tempo”.
Finalmente, e logo de que se abstiveran na votación do ditame en Comisión, En Marea e BNG apoiaron a aprobación desta proposición de lei. Deste xeito, Martín Fernández considerou “fundamental esta unanimidade e volver ao texto de consenso pactado e acordado anteriormente por todos os grupos neste Parlamento, tendo en conta que a sentenza do Tribunal Constitucional ofrece máis posibilidades de éxito”.
