Os populares celebrarán o sábado este tradicional evento que acollerá a máis de medio milleiro de asistentes na Carballeira de San Xusto
O PPdeG abrirá o curso político este sábado 27 de agosto cun acto que terá lugar no concello pontevedrés de Cerdedo-Cotobade e que estará encabezado polo presidente do Partido Popular, Alberto Núñez Feijóo, e polo presidente dos populares galegos, Alfonso Rueda.
A partir das 12.30 horas, a Carballeira de San Xusto será un ano máis o escenario deste tradicional evento que acollerá a máis de medio milleiro de asistentes e no que tamén intervirán o presidente do PP da provincia de Pontevedra, Luis López, e o alcalde do municipio, Jorge Cubela.
Como sinala o vicesecretario de Organización dos populares galegos, Pedro Rojo, “con este acto queremos reafirmar as nosas prioridades a curto e a medio prazo”, explicando que deste modo dáse comezo á actividade do partido para o próximo curso político, que estará marcado por unha data clave no horizonte: as eleccións municipais do 28 de maio de 2023.
Rojo salienta que o PPdeG non se detén e seguirá traballando arreo para ofrecer medidas que ilusionen aos veciños de cada un dos 313 concellos da Comunidade, incidindo na importancia de “servir á veciñanza dende o rigor e a estabilidade”.
Nos vindeiros meses, a formación continuará a pé de rúa en cada recuncho de Galicia escoitando de primeira man as necesidades dos galegos. A ilusión, a motivación e as ganas de servir aos cidadáns guiarán o labor do partido, cuxo obxectivo é acadar gobernos municipais como o da Xunta: un modelo de crecemento económico, de estabilidade institucional e de rigor na xestión.
Así mesmo, en clave autonómica, a organización liderada por Alfonso Rueda seguirá esforzándose por renovar día a día a confianza maioritaria dos galegos, un reto que garante que a nosa Comunidade poida seguir tendo un executivo na Xunta que só dependa do que escolleron os cidadáns nas urnas.
No contexto nacional, Pedro Rojo apunta que os populares galegos tamén buscarán ser unha peza fundamental que axude a Alberto Núñez Feijóo a chegar á Moncloa e a ser “o presidente do Goberno que necesitamos”, nunha situación na que é máis preciso que nunca que España conte coa política estable, responsable e útil que caracteriza ao Partido Popular.
