Santiago, 14 de xuño de 2017.- O deputado do Grupo Popular Jacobo Moreira acusou esta mañá no Parlamento ao BNG e á Deputación de Pontevedra de “non ter rumbo algún na xestión de residuos e pretender agora involucrar nesa viaxe á Xunta de Galicia para compartir esa indefinición”. “O único do que temos noticia é de que están pagando por alugar uns terreos para unha planta de compostaxe da que non se ten nin proxecto”, apuntou.
Jacobo Moreira sinalou que “a día de hoxe a Deputación de Pontevedra non informou á Xunta sobre as actuacións que pretende levar a cabo en materia de xestión de residuos”. “A compostaxe comunitaria debe ser obxecto de autorización administrativa, autorización que a Deputación non ten solicitado, máis habida conta que se trata dunha actividade con certa incidencia ambiental”, indicou.
“A Xunta aposta pola compostaxe a través do Plan de xestión de residuos urbanos 2010-2022, como xestión efectiva dos biorresiduos, xunto coa dixestión anaerobia, menos estendida”, explicou Moreira, quen apuntou que “en todo caso, corresponde ás entidades locais, no marco das súas competencias, elixir o modelo axeitado para os biorresiduos xerados no seu ámbito territorial”.
PLANTA DE COMPOSTAXE INDUSTRIAL
O deputado popular avogou por “seguir impulsando a compostaxe doméstica da man de SOGAMA, que xa conta con 216 entidades adscritas de toda Galicia e ten subministrado preto de 7.000 composteiros”.
A isto, súmanse actuacións divulgativas e formativas, así como a posta en marcha nas instalacións de Cerceda dunha planta de compostaxe industrial con capacidade para 15.000 toneladas anuais, na que tratará a materia orgánica procedente dos concellos limítrofes, cunha previsión de xerar cada ano entre 3.000 e 4.000 toneladas de compost de boa calidade.
