O PPdeG celebra o primeiro aniversario da vitoria electoral de Alfonso Rueda a través dunha campaña en súas redes sociais na que salientan algúns dos fitos que levaron ao presidente a obter a súa primeira maioría.
A través dunha serie de gráficas que comezaron a publicar esta semana e que continuarán a saír á luz ao longo dos próximos días, os populares galegos destacan cuestións como que Rueda é o presidente autonómico con máis apoio na súa Comunidade de toda España logo de obter a confianza de máis do 47% dos galegos.
Tamén que o programa electoral do PPdeG (con 870 medidas) era o máis completo dos partidos galegos, que desde o 18 de febreiro Alfonso Rueda se mantén como o líder galego mellor valorado e o único que aproba nas enquisas, ou que o número de votos recibidos nas urnas (711.713) foi superior á suma do total de votos recibidos por BNG, PSOE e Sumar.
Outras cuestións que porán en valor nos próximos días son, por exemplo, que o mitin celebrado na Praza de Touros o 3 de febreiro reuniu en Pontevedra a 14.000 persoas e foi o máis multitudinario da campaña, así como que o triunfo de Rueda se logrou cun récord histórico de participación nas urnas (votaron o 67,3% dos galegos).
No marco da conmemoración dos resultados electorais acadados o pasado 18 de febreiro e a maiores desta campaña en redes sociais, o PPdeG celebrará un acto o vindeiro sábado 15 de febreiro, coa presenza do presidente nacional, Alberto Núñez Feijóo, para, tal e como adiantou a secretaria xeral Paula Prado, “lembrar aos galegos e galegas que Galicia está en boas mans”. Este aniversario terá lugar no Multiusos Fontes do Sar, en Santiago de Compostela.
O PPdeG suma en total nas súas redes sociais máis de 51.000 seguidores que se distribúen nas diferentes plataformas onde o partido ten presenza: Instagram (máis de 10.000), Facebook (17.000), X (máis de 20.000) e TikTok (4.000).
