17 de maio de 2023. A deputada e coordinadora de Igualdade do PPdeG na campaña do 28-M, Noelia Pérez, critica que o presidente da Deputación de Lugo, José Tomé, “volvera poñer hoxe de manifesto o seu carácter misóxino e machista nas declaracións realizadas a un xornal sobre a xestación subrogada”
Nunha entevista en La Voz de Galicia, Tomé afirmou que as mulleres que chegan a esta situación á hora de ter fillos é porque “non se atreven” ou “por comodidade”.
“Lamentablemente, desde o PPdeG xa temos sufrido este desprezo e falta de respecto ás decisións libres que adoptan as mulleres por parte do señor Tomé”, di Noelia Pérez, quen lembra os seus comentarios denigrantes sobre “a vestimenta e aspecto de leopardo” que utilizou a vicepresidenta do Parlamento galego e presidenta provincial do PP de Lugo, Elena Candia.
AFRONTAR CON RIGOR AS NECESIDADES DAS FAMILIAS
A coordinadora de Igualdade do PPdeG na campaña das municipais considera que a xestación subrogada “é unha cuestión moi delicada e extremadamente sensible como para despachalo con cualificativos como comodidade ou atrevemento, como fai o señor Tomé”.
Deste xeito, avoga por “un debate serio, sereno e afondando nos motivos e nas consecuencias que levan á xestación subrogada, escoitando a todas as partes implicadas, desde expertos, científicos ou xuristas, e, sobre todo, ás mulleres”.
“Debemos ter presente que os políticos representamos aos cidadáns e debemos atender e afrontar con rigor as necesidades que teñen hoxe as familias, sempre respectando o que ditan as normas”, anota Noelia Pérez.
