O PPdeG esixe “explicacións, dimisións e eleccións” a Pedro Sánchez porque España “non pode ter un Goberno en vilo por cada imputado ou por cada novo rexistro da UCO” e é necesario “un Goberno que se ocupe dos problemas dos galegos e de todos españois, non só dos propios”.
Precisamente nunha rolda de prensa ofrecida hoxe na sede autonómica do partido, a secretaria xeral Paula Prado afeou ao presidente do Goberno que leve “44 días sen aparecer ante os medios de comunicación e sen dar explicacións do que está pasando no Goberno de España”. Unha situación que cualifica de “insostible”.
“Cando está implicada por corrupción a muller do presidente, o irmán do presidente, o ex-número dous do presidente e o actual número dous do presidente, ademais do fiscal que nomeou o presidente, é evidente que o problema é o presidente”, sostén a número dous dos populares galegos.
Criticou que todo isto ademais “está danando a imaxe de Galicia” e recordou neste sentido a presenza de Santos Cerdán –implicado nun suposto cobro de comisións– hai uns meses nun acto do PSOE galego acompañando a Xosé Ramón Gómez Besteiro e o propio Pedro Sánchez. Así como a participación no seu día de Álvaro García Ortiz –“o primeiro fiscal xeral do Estado procesado”– e Isabel Pardo de Vera –“presunta socia de Ábalos”– tamén nun acto socialista en Galicia.
Centrándose concretamente na situación do fiscal xeral do Estado, Paula Prado amosou a súa incredulidade ante o feito de que “permaneza nas súas funcións”, xa que “non pode perseguir delitos quen presuntamente os cometeu”. Algo que, na súa opinión, se une a toda unha serie de casos que fan do Goberno de Sánchez un “goberno agónico que está danando a imaxe de España en todo o mundo”.
“Non hai en Europa un primeiro ministro con todo o seu entorno persoal e político investigado por corrupción, nin un goberno que degrade as institucións ou cometa fraudes de lei impunemente, nin tampouco fiscais xerais que senten no banco por delinquir contra rivais políticos seguindo as ordes da Presidencia do Goberno”, sintetizou.
GALICIA, UNHA COMUIDADE FUNDAMENTAL PARA O PARTIDO POPULAR
Paula Prado concluíu que Pedro Sánchez “non pode seguirlle negando aos galegos e a todos os españois a posibilidade de expresarse con liberdade, nas urnas, sobre os feitos tan graves que estamos coñecendo nos últimos meses” e por iso pide a convocatoria de eleccións para que “España teña, da man de Alberto Núñez Feijóo, o presidente que merece”.
“O Congreso Nacional do Partido Popular será o lugar onde dicir que el é o futuro que merece a Moncloa”, engadiu facendo referencia a este evento no que o PPdeG estará representado por un total de 316 compromisarios electos das catro provincias (91 da Coruña, 95 de Pontevedra, 77 de Ourense e 53 de Lugo) e que se dividen entre compromisarios natos (membros da Xunta Directiva Nacional) e electos. E aos que hai que sumar tamén a representantes de Novas Xeracións.
Unha vez concluído o proceso de recollida de avais para a candidatura de Alberto Núñez Feijóo, que no caso de Galicia ascenden a máis de 8.500, o seguinte paso serán as asembleas de votación do candidato a presidente nacional do PP, que se celebrarán o próximo luns 16 de xuño de forma simultánea nas sedes habilitadas.
“O PPdeG terá, como sempre, un papel relevante no Congreso e estou segura de que o seguirá tendo no funcionamento do partido, empezando polo presidente nacional”, subliñou Paula Prado como vogal na Comisión Organizadora deste Congreso e na que José Manuel Rey Varela, alcalde de Ferrol, exerce de secretario.
