Paula Prado supervisou xunto ao Luis López e Jorge Cubela os traballos de montaxe do acto que os populares celebrarán mañá en Cerdedo-Cotobade
A secretaria xeral do Partido Popular de Galicia, Paula Prado, afirmou que a formación inicia o novo curso político “poñéndose deberes” a nivel municipal, autonómico e nacional.
Como explicou, os retos do PPdeG para os vindeiros meses xiran en torno a tres eixos: a nivel municipal, aspiran a gobernar os 313 concellos galegos para que “o 28 de maio de 2023 Galicia se tinga de azul”; a nivel autonómico, axudarán a que as políticas de Alfonso Rueda, orientadas a “solucionar os problemas da xente”, cheguen a todos os veciños; e a nivel nacional, traballarán para que Alberto Núñez Feijóo sexa o próximo presidente de España, pois “Pedro Sánchez é o suspenso máis grande que ten o PSOE” e é “fundamental” un cambio na Moncloa.
Así mesmo, Prado engadiu que os populares tampouco deixarán de “poñer deberes” ao Goberno central. Nese senso, cuestionou que o Executivo nacional elaborase de forma unilateral o seu “mal chamado” Plan de aforro enerxético: “Queremos que o Goberno conte co PP e coa axuda de Alberto Núñez Feijóo, pero lamentablemente Sánchez prefire apoiarse nos independentistas e na esquerda máis radical de España para sacar adiante medidas que o único que buscan é mantelo a el na Moncloa”.
MÁIS DUN MILLEIRO DE PERSOAS
Paula Prado visitou os traballos de montaxe do acto de inicio de curso político que celebrará mañá o partido en Cerdedo-Cotobade. Acompañada polo presidente provincial do PP de Pontevedra, Luis López, e polo alcalde do municipio, Jorge Cubela, a secretaria xeral resaltou que o evento contará con máis asistentes que nunca, pois arrancarán o novo curso con máis dun milleiro de afiliados e simpatizantes.
Ademais da participación de Alberto Núñez Feijóo e de Alfonso Rueda, Prado destacou a presenza en Cerdedo-Cotobade de líderes autonómicos como Juanma Moreno, Isabel Díaz Ayuso, Alfonso Fernández Mañueco e Fernando López Miras.
Segundo indicou, o acto de mañá tamén consolidará os primeiros 100 días de Alfonso Rueda como presidente de todos os galegos —a vindeira semana cumprirá ademais 100 días como líder do PPdeG—, un período no que “xa ten deixado a súa pegada e o seu estilo” con tres obxectivos claros: o traballo, a familia e o futuro, que se están materializando con “medidas e políticas importantes” na nosa Comunidade.
