O Partido Popular de Galicia lamenta que, tras o acontecido onte no Congreso dos Deputados, tanto o PSdeG como o BNG sigan mantendo o seu apoio “cómplice” a un Pedro Sánchez “cada día máis afogado pola corrupción” e “carente de credibilidade” en vez de “axudalo a facer a maleta na Moncloa”.

“Quedou constatado unha vez máis que tanto os socialistas como especialmente os independentistas son cómplices necesarios dun Goberno corrupto nun momento no que xa non hai motivos para apoialo”, incidiu a secretaria xeral Paula Prado esta mañá en declaracións aos medios en Trazo.

A número dous dos populares galegos visitou este concello xunto ao secretario xeral do PP na provincia da Coruña, Evaristo Ben, e aproveitou para poñer en valor que a alcaldesa Fina Suárez é unha das 30 rexedoras que fan do PPdeG “o partido con máis alcaldesas de Galicia”. De feito, neste caso, Suárez conta cun 59% de apoio electoral e goberna con 8 dos 11 concelleiros que integran a Corporación.

“Somos os garantes dun feminismo e dunha igualdade reais que se apoian en mulleres valentes e con capacidade de liderado”, subliñou Prado poñendo como proba dilo que tanto a alcaldesa de Trazo como a de San Cibrao das Viñas, Marta Nóvoa, son dúas das 10 alcaldesas e alcaldes que, por designación do presidente Feijóo, veñen de integrarse por primeira vez na Xunta Directiva Nacional do Partido Popular en representación dos pequenos municipios de España.

Trátase dunha das grandes novidades dos Estatutos do Partido Popular e que foi posible grazas a unha emenda que tamén foi impulsada desde o PPdeG porque, tal e como explica Paula Prado, “nin Galicia se entende sen os seus concellos rurais nin o Partido Popular sen as medidas pensadas para vivir no rural e do rural”.

“Reivindicámonos como o partido do rural porque somos o único que ten en conta os servizos de proximidade, os beneficios fiscais ou a remuda xeracional no agro”, remarcou incidindo en que o Partido Popular, ao igual que fai en Galicia, quere gobernar para o rural de toda España.

Algo que, sen dúbida, quedou claro no último Congreso Nacional do partido e que a secretaria xeral do PPdeG cualifica como “o máis galego da historia” na medida en que foi “o Congreso de Feijóo, de Miguel Tellado, da ‘Rianxeira’ e do que saíu o equipo que máis pronto que tarde chegará a gobernar España”.

A PRESENZA DO RURAL NO PROXECTO POPULAR

Pola súa banda, Fina Suárez quixo manifestar o seu orgullo e agradecemento tanto ao presidente Alfonso Rueda como ao presidente Alberto Núñez Feijóo por brindarlle a oportunidade de “representar ás mulleres do rural e a concellos que, como Trazo, traballan desde a proximidade e a boa xestión”.

Como nova integrante da Xunta Directiva Nacional do partido en representación dos pequenos concellos, comprométese a “seguir loitando con esforzo, dedicación e ilusión para que o rural perdure, teña presenza e sexa respectado”.