O Partido Popular de Galicia mobiliza aos seus representantes para facer forza e dar a batalla en todas as institucións co obxectivo de conseguir que a nova Política Agraria Común (PAC) realmente atenda as necesidades e intereses do sector primario galego.
Con esta premisa celebrouse unha reunión na sede autonómica do partido en Santiago que estivo encabezada pola secretaria xeral Paula Prado e o responsable da PAC e do Control da Cadea Alimentaria no Goberno galego, Juan José Cerviño, e na que participaron deputados nacionais, senadores, eurodeputados e membros da Comisión de Medio Rural do PPdeG.
Todos eles comprometéronse a defender os intereses de Galicia e do seu rural ante o Goberno de España e a Comisión Europea de cara á negociación da PAC para o período 2028-2034 na medida en que consideran que a actual proposta resultaría lesiva para os gandeiros e agricultores galegos.
Critican así que se contemple un recorte de máis do 20% nos fondos –o que suporía unha redución aproximada de 80 millóns de euros anuais para Galicia– e que se pretenda centralizar unha política que, nos termos previstos, deixaría de ser común e afondaría nas desigualdades territoriais.
Por iso os populares defenderán en todas as institucións a modificación da proposta inicial e instan ao Goberno de España a comprometerse a defender unha PAC forte, diferenciada doutros fondos como era ata agora, con recursos suficientes e que responda ás necesidades de Galicia.
