Os deputados autonómicos do PPdeG Raquel Arias e José Manuel Mato destacaron hoxe que a Xunta destinará o vindeiro ano cerca de 650.000 euros aos cinco polos de emprendemento e apoio ao emprego existentes na provincia de Lugo (Mondoñedo, A Fonsagrada, Friol, Sarria e Monforte), uns centros que xa atenderon máis de 1.100 proxectos de persoas emprendedoras desde a súa posta en marcha hai tres anos.
Nunha visita á área de autocaravanas aberta en Sober, unha das empresas coas que colabora o polo de emprendemento de Monforte, Arias e Mato destacaron a importancia destes centros para fomentar a iniciativa empresarial, dinamizar o mercado de traballo e fixar emprego, atendendo as demandas dos diferentes territorios e sobre todo das zonas rurais.
UN 56% DE MULLERES ENTRE AS PERSOAS EMPRENDEDORAS
Na actualidade, desde a súa creación hai tres anos, os cinco polos de emprendemento e emprego da provincia atenderon máis de 1.100 proxectos, dos que case 800 seguen activos.
O número de persoas emprendedoras que acudiron a estes polos de emprendemento achegouse ao millar, das que o 56% foron mulleres. Ademais, arredor do 55% destes emprendedores sitúanse entre os 30 e os 55 anos. Ao longo destes anos, estes centros realizaron máis de 3.400 titorías, das que arredor de 1.100 foron en liña e máis de 2.300 de xeito presencial.
O sector que predominou entre as iniciativas emprendedoras impulsadas desde estes polos lucense foi o da hostalería, cun 20%; seguido polo do comercio (16%) e o dos servizos (12%).
“Estes espazos de dinamización e captación de proxectos ofrecen, entre outros, servizos de información sobre oportunidades de emprendemento; asesoramento personalizado para cada territorio; espazos de traballo temporal e networking; captación de investimento e financiamento; e orientación, asesoramento e recursos físicos para os emprendedores”, indicaron os deputados populares. Ademais, os usuarios poderán acceder a convocatorias anuais de axudas para a consolidación de investimento e a xeración de postos de traballo.
